ORANJESTAD (AAN): Manera ta conoci, tabata Dialuna 2 siman pasa cu den oranan di anochi un persona herida a yega bati alarma na Servicio di Emergencia na ImSan.
Personal medico cu a atende a nota cu e persona aki ta di edad hoben, y el a ricibi tiro den su man. E impacto di bala a rekeri atencion specializa mesora. E hoben a resulta di tin apenas 15 aña di edad.
Polis como tambe Recherche di San Nicolas (DAR3) a wordo envolvi, y a cuminza cu interogacion y investigacion.
A base di esaki, den fin di siman nan a detene 1 homber di 18 aña di edad, como sospecho di a tira e hoben di 15 aña.
Vocero di Polis Lito Lacle, a confirma cu e persona aki lo ga esun cu a tira riba e hoben di apenas 15 aña cu a yega buscando yudanza na ImSan na San Nicolas.
E homber di 18 aña cu nan a detene, ta di inicial L.A.L. y e ta naci na Aruba.
Segun vocero di Polis, nan ta sigui aplaudi e hecho cu pueblo ta yamando pa duna tip pa asina caba cu criminalidad tur caminda.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey Polis ta pidi si bo tin cualkier informacion yama e tipline na 111-41. Nan ta garantisa cu bo ta keda anonimo.
