Tres hende a subi tera na Santo Largo ---ORANJESTAD (AAN): Dialuna anochi, e sistemanan di Marine Radar di Cuerpo Policial di Aruba,
a detecta un ‘contact beep’ sospechoso riba pantaya. E ta mustra cu tin un boto ta yegando Aruba na un velocidad basta rapido.
Basa riba e radar-return aki, mesora Cuerpo Policial hunto cu Guardacosta di Caribe Hulandes a cuminza intercambia un plan cu otro, pa asina hunto drenta den accion.
E radar a mustra cu e speedboat aki tabata yegando Savaneta, y finalmente a bay pa yega cerca di Santo Largo.
Despues di un rato, e speedboat a tuma bek rumbo pa Venezuela. Esey ta indicacion cu el a caba di “drop” su carga na Santo Largo.
Y esaki ta exactamente unda cu unidadnan di Polis a bay concentra.
Oficialnan di Polis a bin topa cu tres stranhero ilegal sin documento, y a gara nan!
Mientras tanto riba lama, unidadnan di Guardacosta di Caribe Hulandes a bay riba e speedboat. Ni maske cuanto señal esnan di Guardacosta tabata duna pa e boto aki stop, toch nan no tabata preocupa cu esaki, y a djis keda cu trot primi rumbo pa Venezuela.
Esaki a pone cu na final, oficialnan di Guardacosta a cuminza los tiro di advertencia. Y den esaki, un di e hendenan abordo di e boto a resulta herida.
Asina na final a logra pone nan stop tambe. Abordo tabatin dos persona, y nan a wordo deteni.
Ora cu a yega Aruba, e persona herida a wordo transporta pa Hospital pa ricibi atencion medico.
Na final, tur cinco persona a wordo transferi na Polis pa asina sigui cu e investigacion.
Guardacosta ta haci un suplica na tur ciudadano cu ta riba lama of banda di costa, pa asina bo mira un situacion sospechoso, pa yama mesora e number 913 cu ta gratis. Of manda un Whatsapp message pa +5999-510-0913.
Cu bo colaboracion, tur hende por yuda pa mantene e lama rond di e isla safe, y percura cu ningun hende cu malesa por drenta e isla na forma ilegal.
