Asistencia pa homber hinca den barica na Rancho

ORANJESTAD (AAN): Diasabra marduga poco despues di 3:10 am,

Central di Polis a core manda unidadnan di Polis di Playa rumbo pa Rancho.  Esey ta debi cu informe a drenta cu den Ranchostraat tin un persona cu a worde hinca.

   Na yegada di polis a resulta cu e persona hinca ta den Emanstraat, pues na final di Ranchostraat bay zuid riba Visstraat y yega den Emanstraat.

   E unidadnan di Polis cu a yega, a bin topa eynan un homber hoben di inicial M. canando cu un T-shirt cu mancha grandi di sanger banda robez di su curpa.  El a hisa su T-shirt y agentenan a mira un hinca net bao di su pecho banda robez. Ambulance ya e momento ey a worde avisa y tabata na caminda.

   Paramediconan cu a yega a bay atende cu e victima, y parse cu e lo tabata envolvi den un problema cu a termina na hincamento.

   Un persona eybanda a splica cu e hincamento a socede un poco mas leu.  Polisnan a cana bay den Emanstraat buscando pista.  Na un lugar a bin haya un plas di sanger abao, y tambe un man di cuchiu, y mas leu un pida cuchiu pero sin e man.  Polis a seya e area y Recherche a ser notifica, y ekipo forensico di BFTO tambe a worde pidi pa presenta na e lugar. E momento eynan ningun persona a worde deteni.  Pero e caso ta bao investigacion.