Accion na Baby Beach pa captura 9 ilegal cu a yega tera

Capitan a keda deteni pa trafico di hende

ORANJESTAD (AAN): E momentonan aki, e network di Marine Radar cu ta vigilando rond di Aruba, ta trahando full capacidad.  Y Diamars madruga pa 1:47 am, e Radar-Room di Cuerpo Policial a detecta un boto no-identifica ta drentando den area zuidoost di Aruba.

   E radar tabata nota cu e boto aki ta drentando den area di Baby Beach.

   Den cuadro di bon cooperacion y cu bon coordinacion entre Radar-Room di Cuerpo Policial, cu Guardacosta di Caribe Hulandes, y oficialnan di diferente districto, a dicidi na mobiliza pa area di Colony pa yuda captura cualkier movimento ilegal.  Tambe a pone unidadnan di cacho K9, y e Helicopter di Polis tambe a lanta vuelo e madruga ey.

   A resulta cu e boto a yega hopi cerca di costa, y aki a “drop” su cargamento humano, cu a yega y subi beach.  Despues di esey, e boto a bira bek direccion zuid, rumbo pa Venezuela.

   Pero Polis hunto cu Helicopter tabatey pa asina localiza y gara un total di 9 persona cu a subi tera.

   Mesun momento, unidadnan di Guardacosta di Caribe Hulandes a cuminza mobiliza pa purba na gara e boto cu ta bayendo zuid, y trata di want’e prome cu e bandona awanan teritorial di Aruba.

   Nan a logra di haci esey na como 3 miya zuid di Cabez di Aruba.  E tabata e momento ey rumbo pa Venezuela.

   E boto tabatin solamente e Capitan abordo, cu paña manga largo bisti, y un petchi color cora riba su cabez.  E no a mustra resistencia y a stop mesora.  Guardacosta a bay abordo y a detene.

   Nan a lastra e boto, y a trece e Capitan bek pa Aruba.  E capitan a worde entrega na e Recherchenan di Unit Mensenhandel Mensensmokkel cu lo sigui cu investigacion. 

E caso ta den pleno desaroyo y e investigacion lo sigui su curso.