Sin cu nan conoce otro, djis pa smak: --- ORANJESTAD (AAN): Tabata tin un tempo cu basta informacion tocante e fenomeno di gang, tabata bin dilanti,
sea door di charlanan na scol, informacion cu voceronan policial mes tabata aporta, como tambe gruponan cu ta traha cu hubentud, y tur esaki pa alerta mayornan y nan yiunan, tocante e peligronan cu ta den un gang ta trece cune, of topa cu un na un forma imprevisto, unda e hobennan ey mes kier busca problema cu otronan, cu ni sikiera nan conoce.
E tema aki, como informacion, a keda manera drumi, y solamente ora tin algun confrontacion entre hobennan incluso cu arma, y cu ta bira noticia di polis, e pueblo ta bolbe corda, of ripara, cu e problema tey ketobay.
Recientemente, un mayor a hiba su yiu hunto cu un par di amigo, nan tur teenager, pa cana un rato den e area cu a bira lugar di encuentro pa hubentud. E mayornan a bay sinta na un distancia di e hobennan pa nan por a combersa, haci wega, hari na nan smak.
Diripiente, nan a mira un grupo di 3 of 4 hoben cu tabata mustra den edad no menos cu 18 aña. E mayornan a ripara cu nan a bisa algo na e teenagernan y cu esaki a hala cana patras. Mesora e mayornan a subi nan auto pa yega mas cerca di e muchanan y a puntra kico ta pasando. E grandinan a bira lomba cana bay, cu un actitud demasiado tof. E teenagers a conta e mayornan cu esnan mas grandi a bin puntra ta ken di nan a haci seña mahos cu dede pa nan, numa pa busca pleito, pasobra e muchanan ningun a haci ningun seña y tampoco nan mayornan por a ripara nada asina, for di unda nan tabata wak nan. Despues, door di un tercer persona cu ta traha den e lugar, nan a haya sa cu e grupo di 3 of 4 ey, sa cana busca problema djis pa smak y semper cu muchanan mas chikito cu nan, y den diferente ocasiona mester hasta a pidi polis pa pasa eybanda, pa “por si acaso”.
E fuente di informacion solamente kier alerta mayornan cu ta laga nan yiunan sali cu nan piernan cu ta den nan 13 pa 16 aña, sea bay cinema of bay sinta come un ice cream, kiermen cu no ta mucha cu ta bishita lugarnan nocturno pa bebe of balia, pa e ora di keiro ta mas trempan como tambe e ora di bay cas back. Ta hopi bon cu tin mayornan ta hiba nan y ta keda warda nan, y ta atento pa wak maske sea for di un distancia, unda e muchanan ta move.
