Accidente serio den cercania di Cayena Mall: auto a dal peaton

ORANJESTAD (AAN):   Diamars anochi, poco despues di 9’or, polisnan a bay cu urgencia na altura di Cayena Mall, unda un auto a dal un peaton cu tabata crusa caminda.

            Na yegada di polis, nan a topa un homber benta banda di caminda. Ambulance tambe a yega rapidamente y a cuminza duna asistencia medico na e sitio mes.

            Segun e informacion preliminar, un vehiculo di marca Hyundai i30 tabata envolvi den e accidente. Parse cu e chauffeur no a mira e cabayero cu tabata crusando caminda, lo cu a causa un fuerte impacto. E evidencia riba e auto ta mustra un windshield kibra na banda drechi, indicando e severidad di e golpi.

            Paramediconan a prepara e victima rapidamente y a transport’é na Hospitaal pa ricibi cuido medico inmediato.

            Polis di trafico a presenta na e luga pa investiga e accidente aki y tuma nota di e circunstancianan.