Accident fuerte riba di dos dia di Pasco na Piedra Plat cu dos herido

ORANJESTAD (AAN): Tabata Diabierna mainta poco prome cu 12’or, cu habitantenan na Piedra Plat a tende un auto ta lastra brake masha largo mes, sigui pa un impacto fuerte.

   Mesora yamadanan a drenta na Polis cu na altura di e cruzada di caminda principal di Pos Abao pa Kibaima, na altura di e T-weg pa bay Carquest Autoparts y tambe Eden Garden Coffee House un accident pisa a socede, y cu un di e autonan a bolter.  A informa cu tin hende herida tambe.

   Inmediatamente Central di Polis a dirigi patruya di Santa Cruz pa e lugar poco pariba di Compleho Deportivo Franklyn Bareño.  Autoridad a bin topa net dilanti Ministerio Internacional Fuente de Vida Aruba (ex-John’s Pizza), un auto compacto Kia Picanto color marron cu number A-59641 cu tur cuatro wiel na halto.  Como 57 meter mas pariba a haya un auto sedan Toyota Corolla color blanco cu number A-81065 banda pazuid di caminda, cu casi tur e parti dilanti destrui.

   Polis a descubri cu e Toyota Corolla tabata bayendo direccion pariba (rumbo Santa Cruz), y for di dilanti Piedra Plat 91 e auto aki a cuminza lastra un brake.  Esey debi cu e Kia Picanto a sali for di e T-weg aki banda di Carquest Autoparts sin duna preferencia.  Aunke a lastra brake, el a dal fuerte contra e Kia Picanto, y a “push’e banda panort” di caminda, unda el a dal y bolter.   E Toyota mes a finaliza te dilanti Piedra Plat 101-C.

   Den e Kia Picanto tabatin un dama hoben herida, y testigonan cu a yega eynan, a dicidi riba nan mesun forza di musculo, pa bolter e auto compacto bek riba su cuatro wielnan.   En total 2 unidad di Ambulance ImSan a yega, pa atende cada uno di e heridonan.  E otro herido tabata den e Toyota Corolla.

   A manda busca Specialista di Trafico pa atende e accident aki, como cu tin di bay check uzando reglanan di trafico, si acaso ta e Kia Picanto a subi sin duna preferencia, of si acaso ta e Toyota Corolla tabata bin demasiado duro y no a regla su velocidad na tempo pa trafico su dilanti.  Pues nan tin e decision final pa cu e causa exacto di e accident aki.

   Pero hecho ta cu e Toyota Corolla for di ora cu el a primi brake, te ora cu el a finaliza y stop banda di Mega Stone Food Market, el a cubri un distancia di 130 meter.

   Tur dos Ambulance a transporta e heridonan pa Servicio di Emergencia na Hospital.  Tabatin varios testigo cu a duna declaracion na autoridad encuanto loke nan a mira, y pesey e caminda aki di Piedra Plat a wordo cera pa algun rato.  Polis a cera e caminda banda di Mido Restaurant.  Polis mira riba potret varios Polis papiando cu chauffeur di un Toyota Landcruiser Prado cu tambe a presencia loke a socede.