Supuesto Pickup preto a dal y sigui core
ORANJESTAD (AAN): Tabata Diasabra anochi poco despues di 7:50 pm, cu yamadanan urgente a cuminza drenta na Central di Polis, pa indica cu auto a caba di dal dos peaton den Caya Musica, direccion panort pa Bubali.
Mesora a despacha unidad di Polis di Noord, como tambe di Oranjestad y Santa Cruz pa e lugar di desgracia, y notifica Centro di Alarma cu a cuminza manda 2 unidad di Ambulance pa e area.
E prome unidad di Polis cu a yega, a bin nota cu berdad den Caya Musica, riba e pida cu ta move di Cunucu Abao bay nort pa Bubali, tin dos persona benta abao na suela, parti pariba di caminda. Esaki ta e area unda yerbanan ta yega cerca di caminda, pues casi no tin acera pa cana riba dje.
E auto of vehiculo cu a dal nan, zwaai ambos persona pariba di caminda. Despues a djis sigui core, pues el a bira un caso di ‘Hit & Run’. Mas unidad di Polis cu a cuminza yega, a yuda coordina pa cera e caminda. E dos personanan a cay na un distancia di como 4 meter leu for di otro.
Paramediconan cu a yega, mesora a cuminza atende esnan herida, y a nota cu uno di nan tin golpi hopi grave. E otro peaton ta herida, pero djis un tiki menos gravedad.
Testigonan eybanda a splica cu nan a tende un golpi y ora di bira nan cara, a mira con e dos peatonnan aki tabata wordo “gezwaai” den halto y cay pariba den e pida cu yerba. Nan a mira cu ta un vehiculo tipo Pickup color preto, cu no a ni stop y a djis sigui core bay nort direccion di e rotonde di Bubali banda di Bubali Food Center.
Specialista di Trafico di Polis tambe a yega, y a ricibi sosten di e team forensico di BFTO. Autoridad ta bay revisa security video di e area pa asina por logra identifica e posibel Pickup preto aki cu a pasa dal dos persona y sigui core bay.
Cu urgencia a transporta ambos herido rumbo pa Servicio di Emergencia na Hospital pa tratamento medico. Ta pidi tur hende cu por a mira algo, of conoce un persona cu tin Pickup color preto cu diripiente Diasabra anochi of Diadomingo mainta a aparece cu golpi na parti dilanti, pa yama Tipline di Polis na 111-41. Corda cu bo por keda anonimo.
Te cu Diadomingo atardi, no a ricibi ningun update di e condicion di e dos victimanan aki.
{gallery}Hit Run serio cu dos peaton herida riba Diasabra anochi den Caya Musica{/gallery}
