Accident fuerte na Cumana a laga basta daño material

ORANJESTAD (AAN): Tabata Diadomingo anochi, algo pasa di 9:30’or, cu Central di Polis a core manda diferente patruya pa caminda di Santa Cruz pa Playa,

na altura di e T-weg net banda di Bon Dia Supermarket na Cumana.

   Prome unidad di Polis cu a yega, a bin topa cu un accident den cual tin dos auto, y un vehiculo envolvi.  Ta trata di dos auto compacto Chevrolet Celta color cora cu number A-78155 y tambe un Toyota Vitz color shinishi cu number A-71937 y un vehiculo, esta un Toyota Hilux Pickup blanco cu number A-74560.

   Testigonan a splica cu na e T-weg aki, pa un of otro motibo e Chevrolet Celta posiblemente a slowdown. Eynan e Toyota Vitz no a mantene distancia y ta dal cu velocidad halto na e banda drechi patras di e Celta. Esaki a causa cu el a kibra e wiel patras di e Celta.  Despues di impacto, e Toyota Vitz a sigui bay dilanti, maniobra y ta bay termina frontal contra e Toyota Hilux cu tabata bin di direccion contrario.

   Ambulance a wordo pidi debi cu chauffeur di e pickup lo a haya golpi, pero no algo di gravedad.

   Polisnan di trafico mesora a cuminsa tuma datos. Doño di e Celta a informa Road Service, cu tanto e y e otro auto envolvi lo regla e dañonan nan mes, debi cu nan conoce otro.

   Caminda a keda cera, debi cu niun di e autonan por a move ariba nan mesun forsa di e lugar mas.