Accident frontal serio na Hooiberg a laga 3 hende herida

ORANJESTAD (AAN): Diaranson anochi riba e caminda di Playa pa Santa Cruz, poco pabao di Hooiberg Supermarket a registra un accidente serio di trafico.

   Mirando cu tabata trata di un accidente frontal serio y cu varios persona herida mesora a despacha e unidadnan di rescate di Brandweer y tambe ambulancenan.

   Polis mientrastanto ta yega na e lugar y ta constata cu tin tres homber herida.  E ta un accidente frontal, entre un Hyundai Accent preto y un Mitsubishi Lancer. 

   Personal di Vehiculo di Rescate di Bombero a drenta den accion pa libera un persona cu a keda pega den e Lancer. Mientras e otro victimanan Paramediconan hunto cu polis tabata saca nan y ponenan ariba brancard pa despues sali direccion Hospital. 

   Testigonan a conta cu e Mitsubishi Lancer a yega bira sin duna preferencia dilanti e Hyundai Accent, causando un impacto frontal hopi fuerte.

   E caminda mester a worde cera den ambos banda, pa e unidadnan di rescate por a haci nan trabao. Polisnan di trafico a presenta pa asina cuminsa nan investigacion. Bureau Slachtofferhulp tambe lo a worde poni na altura pa e accidente serio aki.

   E area aki ta uno conoci pa accidentenan di trafico serio, te hasta fatal den pasado.