ORANJESTAD (AAN): Na numeroso ocasion den ultimo añanan, DIARIO a mustra riba e peligro na momento cu bo pone un smartphone ‘Ta Bende’ riba social media,
y cu buena fe bo ta hiba esaki pa e bendedor, y e shon aki ta rek careda desaparece cu bo aparato, y abo awor a keda sin smartphone y sin placa. Casonan asina a socede hopi biaha den area di rotonde di Pos Chikito, na Pos Abao, y awor tambe na Casnan di Pueblo na Noord.
Tabata recien riba un Diasabra anochi pa 9:30 pm, cu a presenta na Warda di Polis na Shaba e ciudadano di inicial Y., pa asina haci entrega di keho di ladronicia.
El a declara cu e ta doño di un Apple iPhone 11, color biña, di 64GB, y cu tin balor di como 900 Florin. El a bisa cu e Diasabra ey el a pone un ‘post’ riba Facebook pa ofrece su iPhone na benta.
El a ricibi un mensahe via su inbox di un usuario di inicial T. E persona T. aki a informa Y., cu e ta hopi interesa pa cumpra e smartphone aki. Asina nan a palabra cu e Diasabra anochi ey pa 9:00 pm, Y. lo bay topa cu T. den area di Christiaanstraat na Noord, pa asina e por cumpra e smartphone.
Ora cu e ciudadano Y. a yega den e caya, el a wordo acerca pa un homber. E persona aki tin color di cuero bruin, cu cabey dreadlocks. E ta mustra di ta un persona basta hoben, y tin un postura ancra, pues tiki gordo.
E hoben aki tabata lomba sunu, y tin djis un short preto na su curpa. E ciudadano Y. a entrega su iPhone 11 na e hoben pa asina e por mire. Na e momento ey e homber a declara, cu e lo bay mustra e smartphone aki na su mama. Despues di a bisa esaki, e homber a cana bay na un cas den Christiaanstraat.
Aki e bendedor Y. a keda como 5 minuut ta warda pafo di e cas. Mirando cu e hoben no ta bin bek, e ciudadano Y. a dicidi na bay bati na e porta di e cas. Poco despues un señora a sali. El a bisa e ciudadano Y. cu ningun hende a drenta su cas. El a laga sa tambe cu e no sa nada di un smartphone.
E ciudadano Y. a dicidi na activa su sistema di ‘Find my iPhone’, y a nota cu su aparato horta e ora ta den Semeleerstraat. E location ta mustra cu e ta den area di e Carwash cu tin den Semeleerstraat.
E ciudadano Y. a manda algun mensahe via Inbox di Facebook pa T., pero e persona no tabata reacciona. Diripiente el a ripara cu T. a block e riba Facebook.
Pesey el a entrega keho di ladronicia na Polis, y autoridad a tuma esaki.
Bo por preveni esaki: Den pasado na numeroso ocasion, DIARIO a sugeri pa e tipo di bendemento aki socede dilanti un Warda di Polis. Si bo ta bende un iPhone, bisa e cumprador cu e por topabo dilanti porta di cualkier Warda di Polis mas cercano. Di e forma aki bo ta sintibo mas safe ora di bende bo smartphone of computer.
Alavez cualkier ladron lo no acepta pa bay topabo dilanti un Warda di Polis. Pues sikiera asina bo ta scapa.
