Accident fatal a cobra bida di peaton na Santa Helena

Victima ta Liris Aurelia Senior Barrios

• Chauffeur pa colmo despues a huy na pia 

ORANJESTAD (AAN): Riba Diasabra cu a pasa, solo na Aruba a sali pa 6:26 am, pues ora cu yamada a drenta pa 6:45 am cu un accident grave a caba di socede riba Santa Helenastraat na Playa, e momento ey ya caba tabata cielo tabata basta cla.

   Mesora unidad di Polis di Playa a mobilisa pa e area, y Centro di Alarma na su turno a cuminza manda Ambulans.  E prome unidad di Polis cu a yega, a nota cu e accident a socede net na e T-weg di Santa Helenastraat cu Emmastraat, cerca di Xavier University su campus cu tin na Santa Helena.

   Polis a bin haya un persona femenino benta boca abao na suela como 10 meter leu for di caminda di Santa Helenastraat, cerca di e cura di cas Emmastraat 70.  Esnan eybanda a bisa Polis cu e dama no ta reaccionando.  Polis tambe a bay check, y no ta haya reaccion di dje.

   E auto sedan Toyota Corolla color blanco cu number A-26475 tabata para kibra como 5 meter pariba di e curpa di e peaton, y tabata basta kibra tanto banda robez y tambe banda drechi.  Por a mira un impacto fuerte na banda di bumper y front grille banda drechi, e wantalodo banda drechi, y impacto na e windshield banda drechi tambe.  Hendenan eybanda a bisa Polis, cu e chauffeur a cana bay.

   Poco mas pariba tin un SUV Toyota Harrier cu number A-50837 staciona cu tambe tin poco sla na banda robez.  Hendenan a bisa Polis cu e Toyota Harrier ta staciona eynan, pues no tabata moviendo riba caya.

   For di e lastro di wielnan, Polis a deduci cu e Toyota blanco tabata bayendo riba Santa Helenastraat for di Ponton direccion pabao pa Belgiestraat, y aki a bay banda robez di caminda, baha y dal den e Toyota Harrier, aki e auto Corolla a dal un zwaai y despues lo a dal e peaton cu net e momento ey ta canando bayendo pa su trabao na un residencia eybanda.  Pero e teoria aki tin di wordo investiga door di Polis di Trafico pa mas detayadamente produci un rapport, como cu tin chens cu e peaton a wordo gedal prome cu e impacto contra e Toyota Harrier.

   Ambulans a yega poco rato despues, y e Paramediconan mesora a bay atende e persona femenino, pero a bin nota cu e no tin ningun señal vital.  Nan a informa Polis cu tin di manda busca Docter, como cu no por haci nada mas.

   E momento ey, henter e caminda a wordo seya, y a manda notifica autoridadnan mas halto, como tambe Team Forensico di BFTO, Docter Forensico, y Bureau Slachtofferhulp.  Nan a yuda ora cu e famia a aglomera eynan y a bay den tristeza profundo.

   Docter Forensico a yega, y asina Dr. Wemeijer a constata morto di e señora victima Liris Aurelia Senior Barrios.  Señora Senior Barrios ta di Barranquilla, Colombia, y a nace dia 25 September 1959, pues tin 66 aña di edad.  Cu shersh di Funeraria, su restonan mortal a wordo lanta di eybao.

   Polis despues a ricibi informe cu e chauffeur di e Toyota Corolla a raporta su mes, y autoridad a core bay na su cas y a detene pa investigacion.   Nan a lage supla riba e aparato di AlcoSensor, y esaki a produci resultado di 0,0 µg/l, pues e no ta burachi.

   Pero toch lo kier tende e storia, pakico el a hala na su man robez y baha di caminda cu su auto.  Algun observador ta kere cu e tabata bin di pariba cu basta velocidad, y lo a perde control den e birada ‘suave’ cu tin eynan di Santa Helenastraat, y lo a coregi demasiado riba su stuur, y asina a perde control.  E no por bisa cu ta rayo di solo a ‘blind’ e temporalmente, debi cu e ta bayendo pabao e momento ey.

   Vocero Liliana Rasmijn a indica cu señora Liris Aurelia Senior Barrios a bira e di 5 morto di trafico pa 2026.  Na famia di e fayecida, tanto DIARIO y Cuerpo Policial ta extende su mas profundo palabra di condolencia.