Accident cu herido na e cruzada dilanti Centro Caiquetio na Paradera  

ORANJESTAD (AAN): Tabata Dialuna atardi banda di 5:30 pm, Central di Polis a manda unidad di Polis di Santa Cruz na e cruzada cu tin net banda di Centro Caiquetio na Paradera.

   Ora cu patruya di Polis a yega, a bin nota cu ta trata di un accident entre un subcompact crossover SUV modelo Nissan Kicks color cora, y un SUV modelo Kia Sportage color shinishi.  E Kia Sportage a bay finaliza cerca di cura di cas Paradera 131-F.  Den e Kia Sportage tabatin un pareha cu un baby.

   E cruzada aki ta uno cu trafico di man drechi tin preferencia.  Ora cu Polis a check cu cada chauffeur di unda nan ta bin, a deduci cu ta e Nissan Kicks no a duna preferencia y ocasiona e accident.

   Un dama den e Nissan Kicks tabatin mester di asistencia medico. Ambulance a presenta y hunto un Paramedico el a cana bay direccion di e auto unda e tabata wordo trata.

   A manda busca Polis di Trafico tambe, pa asina tuma dato di ambos vehiculo.  E baby tabata mustra bon, pero asina mes por a mira e mama bay cu direccion di e ambulance hunto cu e Paramedico.