A descubri sistema nobo cu GoFast cu droga ta haci delivery na barconan riba lama grandi

Confisca 4 ton di cocaina riba lama net pafo di Caribe

ORANJESTAD (AAN): Autoridadnan di Spaña a caba di divulga e siman aki, un accion grandi cu nan a haci riba lama hunto cu e.o. Marina y Forza Aereo di Portugal, y tambe autoridad di cuatro otro pais, pa asina intercepta un cargamento di 4 ton di cocaina cu tabata abordo di un Barco di Pisca Venezolano.   Na final di cuenta, un total di 20 persona a keda deteni.

   E accion aki no a socede na Spaña, sino mas bien den Lama Caribe!  Pero a haya sa si cu e droga tabatin Galicia (Spaña) como destino.

   E pesquero Venezolano aki tabata usa un sistema di speedboat tipo GoFast pa transporta y busca droga den area di isla di Martinique y tambe cerca di Suriname.

   E organizacion Udyco di Cuerpo Policial di Vigo, cu ta un ciudad na parti noordwest di Spaña, tabata lidera e operacion policial aki cu tabata desaroyando pa 4 luna caba, y nan a yame ‘Caso Fantauxía’.  Nan tabata usa inteligencia pa asina sigui e proceso di comienzo ora cu e Pesquero aki tabata prepara pa sali for di Venezuela, y con e tabata move na forma scondi den Caribe pa pasa na varios isla y ‘recoge’ carga di droga, pa na final e sali rumbo cu e 4.000 kg di cocaina aki pa cruza Oceano Atlantico y yega cune na costa di Spaña.

   Tabatin 20 hende deteni, entre nan 3 persona cu ta cabezante di grupo di narcotraficante na Venezuela y cu ta doño di e droga.

   Den e accion aki a participa tambe e Grupo Greco (special pa crimen organiza) di Galicia, hunto cu demas Polis di Spaña, tambe Marina y Forza Aereo Portugues, Polis Hudicial Portugues, y Ehercito di Francia.  E operacion a dura varios luna y ainda e investigacion ta habri.

   E lugar unda dia 17 di Januari nan a intercepta e pesquero “Caribe Azul’ tabata den area entre Martinique y Suriname, pa ta exacto como 800 km noordwest di Suriname.

   E pesquero aki ‘Caribe Azul’ a sali di e pier El Duque na Cumana (estado Sucre) dia 13 di November 2020 y na Januari el a move for di e zona normal di piscamento.  Despues el a topa riba lama cu e barco Arcangel cu a bin di Puerto La Cruz.  Nan a pasa droga over pa e pesquero usando speedboat tipo GoFast cu nan ta lastrando patras di e pesquero.  Despues e pesquero Caribe Azul a keda warda den awanan internacional sperando riba yegada di un otro barco pa recoge e droga, pero esaki nunca a yega.

   Finalmente ta un Barco di Guera Frances a yega y a subi abordo di e pesquero.  Tur tripulante a keda deteni, incluyendo uno di nan cu na 2015 a wordo condena den Corte na Miami di a colabora cu un narcotraficante Colombiano.

   A sali na cla cu for di Juni 2020 caba inteligencia tabata sigui e paso di e grupo aki, cu tin un hefe narcotraficante scondi na Cataluña cu ta organiza transporte di cocaina via lama, y pa trece esaki pa Europa.

   Asina a bin haya sa con e ta planea e transporte nobo aki usando un pesquero Venezolano pa cruza Oceano Atlantico.  Pesey a busca yudanza hudicial di seis pais pa yuda den e investigacion.

   E oficialnan Frances cu a subi abordo, a bin haya 177 paki di droga.  E peso final ta di 4.248 kilo di cocaina.  Un di e detenidonan ya tin antecedente criminal na Spaña, ora na 2008 nan a detene cu un transporte di 2.8 ton di cocaina.

   Ademas di esaki, e operacion aki a descubri cu Speedboatnan tipo GoFast no ta wordo usa djis pa transporta droga pa drop na un pais, sino cu esaki ta wordo usa pa yega rumbo na un Boto di Pisca riba lama grandi pa asina transferi e droga.  Y ta haci esaki den zonanan cu ta hopi aleha unda realmente Guardacostanan den Caribe no ta operando.

   E potretnan aki pa cortesia di Polis Nacional di Spaña ta mustra momento cu nan a caba di confisca e pesquero, y tambe por mira e droga riba dek di e barco di Marina Frances.