E realidad di 486.8 Miyon na importancion y 48.1 Miyon na exportacion --- Aruba mester di placa stranhero pa por paga productonan importa -- E regreso na normal mester ta basa riba diversificacion di exportacion
ORANJESTAD(AAN)- Na final di 2021, atencion ta keda dirigi riba decisionnan cu ta wordo tuma dor di Gobierno Wever-Croes 2 y sigur riba e persona na cual e gobierno aki debe su nomber, cu ta Prome Ministro Evelyn Wever-Croes.
Gobierno ta un continuidad na un pais democratico, caminda Pueblo ta eligi su gobernantenan durante eleccionnan cu por trece cambio den e partidonan den Gobierno.
Sinembargo, tur Gobierno ta hereda loke e otro a laga atras manera semper nos a mustra.
Esaki ta haci cu Gobierno Wever-Croes 2 ta hereda loke e prome Gobierno Wever-Croes a ricibi na 2017 hunto cu loke e Prome Gobierno Wever-Croes mes a produci.
For di 2018 Aruba tabata riba un caminda di recuperacion den cual a pone plannan pa futuro den accion y a scrap loke a keda pa pasado, manera e refineria Citgo cu DIARIO a base di investigacion profundo for di 2018, a declara fantasia.
Na 2020, Covid-19 a destrui e plannan original pa recuperacion financiero hunto cu Hulanda, cu tabata hancra den e prome presupuesto di Aruba, cu un saldo positivo pero cu mester a wordo adapta ora Covid-19 a bati na porta.
Na e momentonan aki Gobierno Wever-Croes ta sigui traha riba e maneho financiero final cu cual Aruba mester drenta futuro, pero cu ta depende tambe di algo esencial cu a parce di ta perde atencion.
Nos no a perde atencion pa e Masterplan cu a wordo lansa dor di Gobierno Wever-Croes na momento cu Covid-19 tabata tin Aruba den su gara.
E Masterplan aki ta sostene nos vision tambe pa un Aruba sano, cu manera semper nos a sostene, mester di diversificacion economico y no por depende solamente di turismo cu na 2020 a demostra kico ta e peliger pa cual semper nos a adverti for di 1986, cu ta “hinca tur puito den un macuto di turismo”).
Tin un motibo pa cual Aruba prome cu 1986, mescos cu tur pais na mundo, a traha duro riba turismo, cu tin diferente categoria.
E turismo di Aruba tabata basa sigur riba e beachnan unico di e pais, cu a produci turismo di recreo y di convencion na un nivel menos.
Venezuela tabata importante pa turista di compra.
Pero tur tipo di turismo ta pone importacion den balansa y ta wordo considera exportacion pa e placa stranhero cu e ta produci y cu Aruba ta uza pa paga su productonan importa.
Nos atencion ta keda fiha riba e partinan di e Masterplan di Gabinete Wever-Croes Uno, cu tabata papia di diversificacion basa entre otro riba industrianan cu ta recicla.
Dos proyecto cu sigur directamente y indirectamente ta importante pa diversifacion ta e proyecto di gas y e refineria no solamente pa e trabou cu nan lo crea y e placa cu na Aruba nan lo pone den circulacion.
E proyecto di gas por ehempel, lo sostene un prijs di awa mas barata cu ta importante ora ta atrae mas compania cu kier hinca nan placa den Aruba.
E companianan aki lo produci productonan pa exporta. Esaki ta nifica cu e exportacion di Aruba ta crece y mas placa stranhero ta alcansa Aruba y e stabilidad monetario di Aruba, di Florin pues.
Cambionan cu por spera mundialmente sigur lo amplia posibilidadnan di diversificacion pa Aruba riba tereno no “industrial”, pues fabrica.
Mescos cu ta e caso na final di 2021, DIARIO ta realisa tur analisis y investigacion pa hunto cu Aruba enfrenta un futuro cu mester cambia e cifranan di 486. Miyon Florin na Importacion y 48.1 Miyon na Exportacion cu mester entrega Aruba entrada nacional, empresarial y personal pero sigur divisas (placa stranhero) pa cubri nos importacion!
