Pa 5 or di atardi Dia di Betico ---
ORANJESTAD (AAN) – Minister di Finanzas y Cultura, Xiomara Maduro, a duna di conoce den conferencia di prensa, cu pa Dia di Betico, esta dia 25 di Januari, ta bay tin un actividad pa tur hende na Aruba ta hunto cu otro.
E mandatario a splica cu e actividad aki ta dirigi na e hobennan pasobra cerca nan gobierno kier inculca e amor pa Aruba, pero tambe e inspiracion cu Betico ta pa hopi Arubiano y tambe por ta pa e generacion cu ta sigui.
Pesey, riba e dia di Betico tin un competencia, tambe virtual, cu yama “kibra coco”.
“Kibra coco ta pa scolnan basico y tur por participa. Nan tur lo haya informacion con pa participa, y akinan mester bisa e ora ey cu ta den famia nos por haya celebra, y mas cu claro gana un premio tambe cune, pa sa un poco mas locual ta Betico, su lucha, con e tabata y kico tur el a logra pa nos pais”, e dignatario a subraya.
Kibra coco ta cuminza pa 5 or di atardi, y lo pasa e ora ey pa e canalnan local di television, y sigur e ta bay tin un serie di preguntanan, entrevista, e ta bay ta interactivo, y lo tin como anfitrion señor Jean Carlo Espinal.
“Esaki, mi tin cu bisa, ta un programa cu nos ta bay continua. E Comision Celebracion Dianan Nacional hunto cu un ekipo di maestronan di scol, a hinca esaki full den otro cu e bon cooperacion di Tele Aruba, y tambe di Setar pa facilita nos cu e parti tecnico necesario, y e conocemento di Departamento di Cultura. E produccion di e Lid ta permiti cu e ‘Kibra coco’ aki ta bay ta algo dushi pa nos por celebra cu otro den famia; y pa keda na moda tin tambe un ‘Betico Challenge’ pa na momento di kibra coco e participantenan por saca nan selfi, y por mande via WhatsApp via 597-2323.
Lo distribui tur e informacion pa tur hende tine y asina mustra e union familiar, pasobra famia ta importante, famia ta e base di un pueblo, y pueblo ta e base di un pais, y pesey e union di famia aki nos kier fomente den e parti aki pa sa mas di Libertador Betico Croes, pa medio di e competencia virtual kibra coco ”, Minister Xiomara Maduro a indica.
