Relato di e Indice di Prijs di Consumo
ORANJESTAD (AAN): Oficina Central di Estadistica (CBS) a caba di saca nan rapport di e Indice di Prijs di Consumo (CPI) pa luna di Juli 2026.
E CPI pa luna di juli 2026 (111.53) a registra un caida di 0.4% compara cu e indice di luna di juni 2026 (111.98).
E cambio di e CPI pa e ultimo diesdos (12) lunanan (juli 2025 te cu juli 2026) ta 2.2%, un subida di 2.3 punto di porcentahe (ppt) compara cu e periodo corespondiente di aña pasa (-0.1%).
E promedio anual (ultimo 24 luna) di e tasa di inflacion pa e periodonan di juli 2024 te cu juli 2025 y juli 2025 te cu juli 2026 ta 0.7%. E cifra aki no a registra un cambio compara cu e cambio promedio registra durante e periodo anterior di 24 luna (0.7%) (juli 2023 te cu juli 2024 y juli 2024 te cu juli 2025).
Durante luna di juli 2026, ocho di e 12 sectornan a registra caidanan di prijs. E sectornan cu tabatin e mayor impacto riba e CPI tabata “Mobilario” (-3.7%), “Transporte” (-0.8%) y “Salud” (-5.1%), contribuyendo respectivamente cu -0.30, -0.11 y -0.11 ppt. E caidanan den e sectornan restante a contribui hunto cu -0.11 ppt na e CPI di juli 2026.
E caidanan aki a wordo parcialmente contraresta, principalmente door di un aumento di 2.2% den e indice di e “Comunicacion”, cu contribui cu 0.19 ppt na e CPI. E subidanan den e sectornan restante a contribui hunto cu 0.04 ppt na e CPI di juli 2026.
E caida den e sector di “Mobilario” a wordo causa principalmente door di caidanan di 11.8% y 9.9% den e categorianan “Herment y ekipo pa cas y hardin” y “Mueble y accesorionan, tapijt y otro tipo di material pa vloer”, causando un efecto di respectivamente, -0.11 y -0.08 ppt.
E caida den e sector di “Transporte” a wordo causa principalmente door di un caida den e categoria “Gasto relaciona cu uso di vehiculo di transporte personal” (2.2%), causando un efecto di -0.19 ppt. E caida den e sector di “Salud” a wordo causa principalmente door di un caida di 7.4% den e categoria “Producto, aparatonan y ekipo medico”, causando un efecto di -0.11 ppt.
E subida den e sector di “Comunicacion” a wordo causa door di un subida di 26.4% den e categoria “Ekipo di telefon y fax”, causando un efecto di 0.19 ppt.
Canasta di Consumo: E canasta di consumo di e CPI ta consisti di 408 bienes y servicionan. Compara cu juni 2026, 32.8% di e bienes y servicionan aki a registra un aumento di prijs, causando un efecto di 0.83 ppt, mientras cu 51.5% a registra un caida di prijs, contribuyendo cu un efecto di -1.23 ppt.
Pa e restante 15.7%, no tabatin cambio di prijs. Compara cu juni 2026, prijsnan di bienes a registra un caida di 0.9%, causando un efecto di -0.51 ppt, mientras cu prijsnan di servicionan a registra un aumento di 0.3%, contribuyendo cu un efecto di 0.11 ppt riba e CPI di juli 2026.
Core Inflation: E asina yama CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total.
Pa Juli 2026, E CPIC (core inflation), cu ta exclui e efecto di energia y cuminda, ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual). E CPIC a registra un aumento di 0.9% na juli 2026. E indice di energia, componi di electricidad, awa, gasolin y diesel, a registra un caida di 0.6%. E indice di cuminda a aumenta cu 1.7%.
