Hues ta cuestiona cu e retironan no tabata suficiente motiva
ORANJESTAD (AAN): Hues den Corte di Prome Instancia a cuestiona e retiro di 15 Comisario for di companianan di cual Utilities Aruba NV (UA) ta e accionista y a ordena pa tur e companianan tuma tur e 15 Comisarionan back na trabao cu nan pago y cu nan por drenta trabao. Esaki, te ora cu den un caso mas profundo, Corte dicidi riba e legalidad di e retiro di e 15 Comisarionan.
Esaki ta e sentencia cu Hues di Corte di Husticia a duna Diabierna, den e caso sumario cu 15 Comisario a cuminsa contra e companianan: WEB Aruba NV, NV Elmar, Aruba Wastewater Sustainable Solutions (AWSS), Aruba Renewable Energy N.V. (ARE) y Utilities Aruba NV (UA).
Ta asina cu na Juli 2025, tur e 15 Comisarionan a haya carta di nan compania, informando cu den un reunion general a dicidi, cu no tin confianza mas den nan y cu nan no ta miembro mas di Comisario. Despues nan tur a worde retira.
E 15 Comisarionan a cuminsa un caso sumario contra tur e companianan y Utilities Aruba NV.
Un exigencia no-admisibel: Hues den su evaluacion di e caso, ta mustra cu e 15 Comisarionan a exigi pa Hues ordena Utilities Aruba NV, pa hala nan retironan aden, te ora cu den un caso mas profundo, Corte dicidi riba e legalidad di e retironan.
Utilities Aruba NV a reacciona cu e no por worde mira como parti di e companianan ya cu e ta accionista di e companianan y no un compania caminda e Comisarionan ta den funcion.
Hues ta haya cu Utilities Aruba N.V. tin razon y a declara tur e 15 Comisarionan no admisibel den nan demanda.
Cuestiona retironan pa motibo politico: Hues ta haya cu no tin suficiente motivacion di parti di e companianan, cu ta hustifica e retiro di e 15 Comisarionan.
Na opinion di Hues, e solo hecho cu a bin un cambio di Gobierno, no ta suficiente. Hues ta comparti opinion di e 15 Comisarionan, cu nan retiro ta puramente pa motibo politico, esta cambio di Gobierno.
Hues su decision di e caso sumario ta, cu e ta declara tur e 15 Comisarionan no admisibel den nan demanda contra Utilities Aruba NV.
Tuma tur bek y cu salario: Hues ta suspende e decisionnan di retiro di e companianan di Utilities Aruba NV tuma 11 Juli 2025. Esaki te ora cu den un caso mas profundo, Corte tuma un decision riba e legalidad di e retironan.
Hues a ordena tur e companianan di Utilities Aruba NV, pa paga tur e 15 Comisarionan nan salario te ora cu tin un decision den e caso mas profundo. Esey ta encera, salario y e beneficionan manera ta para den e contractnan.
Daño y perhuicio: Hues a stipula cu cada compania lo mester paga un daño y perhuicio di 2.500 Florin pa cada dia cu keda sin cumpli cu e sentencia, te un maximo di 250 mil Florin.
Hues a ordena tambe cu cada compania mester laga cada Comisario por drenta tur localidad, oficina, sin cu e ta worde stroba. Mester percura pa cada Comisario haya tur documento di reunionnan relevante, informacionnan di e directiva, facilidadnan di comunicacion pa asina nan por haci nan trabao di observacion.
Mester percura cu cada Comisario lo por haci su trabao manera e tabata haci.
