Ademas di daño per huicio di 10 mil florin
ORANJESTAD (AAN): E homber Haitiano C.E. di 51 aña biba na Aruba, a haya un baño di awa frieu ora el a scucha Fiscal exigi 4 aña di prison p’e y pa paga daño per huicio di 10 mil florin.
5 acusacion di presiona muhernan di bida: Diabierna Hues di Corte di Husticia a trata e caso penal cu Ministerio Publico a cuminsa contra e homber C.E., doño di dos bar na San Nicolas. Fiscal a bisa Hues cu tin 5 acusacion contra C.E. cu ta encera cu e aña aki entre Januari y Maart 2025, a haci traficacion di muhenan di exterior cu a bin Aruba pa traha como muhernan di bida.
Tambe cu e tabata presiona e muhenan pa busca cliente pa asina por paga e huur di camber. Tambe cu e lo a laga muhernan haci prostitucion, siendo cu e ta prohibi.
Traficacion di hende: Hues a puntra C.E. riba e traficacion di hende pa bin traha den bar. Segun C.E., e muhe J. lo yam’e y el a bisa cu e lo por yuda den prostitucion. C.E. a splica Hues cu e regla di su barnan ta, cu ta paga e permiso di estadia pa e muhenan y ta paga nan aseguro medico.
Ta duna e muhenan lugar pa keda y mester mantene e camber limpi. Nan ta permiti pa traha solamente den e 2 barnan na San Nicolas. Nan no por bay traha na otro bar. Nan ta liber di haci otro cos riba nan mes. Segun C.E. e ta bisa e muhenan cu mester paga 110 florin pa e camber. Ta asina cu e dos barnan tin en total 8 camber.
Doño di bar ta nenga: Hues a bisa cu e muhe J. a declara na Polis, cu e mester paga 10 florin, si e haya cliente y si e bay cu un cliente pafor di e bar, e mester paga 100 dollar boet. Segun C.E., esey no ta berdad. El a bisa cu no tin boet. Segun C.E., ta e muhenan ta bisa e cliente esey, pa nan gana mas placa. C.E. a duna un splicacion amplio na Hues con negoshi di prostitucion ta y con e muhenan tabata cobra clientenan cu no ta asunto di bar. Hues a mustra cu e otro muhe L. tambe a declara mesun cos.
Hues a sigui bisa cu tin un testigo muhe cu tambe a declara mesun cos. Un muhe empleado di e bar, muhe M., a bisa cu pa cada cliente cu bay den camber mester paga 10 florin y si bay cu e cliente for di bar ta 100 dollar. Si e muhe keda mas cu mey ora den camber, e mester paga boet.
C.E. tabata sacudi cabez y a bisa Hues cu e muhenan ta gaña. El a bisa cu e muhenan ta paga solamente 110 florin pa e camber. C.E. a bisa Hues cu tin muhenan ta palabra cu ne pa bisa cu ta cobra 100 dollar di boet pa asina nan cobra e cliente pa nan haya e placa. Fiscal a haci C.E. un serie di pregunta y C.E. cada vez ta bin cu splicacionnan grandi. Fiscal tabata hala su atencion pa duna contesta y no bin cu storianan.
Demanda di daño: Un muhe di e instancia cu ta yuda hendenan, a hiba palabra den Corte y a haci demanda di daño. El a bisa Hues, cu e muhe L. mester a paga 651 Florin pa pasashi y 180 florin pa por a sali for di Aruba. Ta gastonan cu Gobierno a paga pasobra L. no tabatin placa. Tambe L. a demanda e placanan cu e lo a gana C.E. den 56 dia. E muhe a bisa cu L. mester a keda den un shelter promer cu el a bay for di Aruba. E muhe a demanda daño inmaterial di 10 mil florin.
Fiscal a exigi 4 aña di prison: Fiscal a bisa Hues cu C.E. a usa e muhenan pa gana placa riba nan cabez door di laga nan haci prostitucion. Fiscal a mustra cu segun ley, ora ta explota muhenan, ta tacha integridad di e muhenan. Na opinion di Fiscal, ora ta pone e muhenan haci prostitucion, no por papia di libertad. Fiscal a bisa Hues cu e ta haya e declaracion di e muhenan creibel. Fiscal a señala cu tin di e muhenan a keda Aruba mas tempo cu segun e permisonan. Fiscal a mustra cu C.E. tabata explota e muhenan bou presion.
Na opinion di Fiscal, C.E. tabata gana 6 biaha mas hopi placa cu e huur di e cambernan compara cu loke e bar mes ta produci. El a mustra cu e muhenan a bisa cu nan mester a paga hopi placa na huur y nan mester a traha pafor di bar pa asina genera placa pa paga huur di camber y manda placa pa famia. Un di e muhenan a bisa cu el a paga 14 mil florin na C.E.
Fiscal a condena e actitud di C.E. El a mustra cu segun ley, pa e tipo di traficacion di hende y explotacion di hende, el a exigi 48 luna di prison di cual 6 luna ta condicional cu un tempo di prueba di 5 aña. Fiscal a bisa cu e parti condicional ta pa forza C.E. stop di explota hende di e forma aki. Tambe Fiscal a exigi pa prohibi C.E. cu den e periodo di 5 aña pa pidi permiso pa trece hende of laga otro hende pidi permiso. Fiscal a sigui bisa cu e demanda di daño material no ta admisibel pero e demanda inmaterial si. E demanda inmaterial ta 10 mil florin of 60 dia cera.
Abogado: mr. D.Croes a bisa Hues cu C.E. ta wordo acusa di hechonan hopi pisa. C.E. ta desmenti esakinan. E abogado a bisa cu trabao di prostitucion ta prohibi na Aruba. Muhenan den region ta bini Aruba pa traha prostitucion. Na Aruba ta busca tur forma di proteha e muhenan aki di abuso. Ta hasta manda un carta hopi specifico na muhenan cu kier bin traha den prostitucion, kico por spera nan. Nan ta firma e carta aki di ta di acuerdo. Hasta tin tipline pa e muhenan por denuncia abusonan. E abogado ta haya straño con Fiscal ta cambia cosnan cu no ta berdad. Na opinion di mr. Croes, ta e muhenan ta yama y pidi C.E. pa nan bin traha na Aruba. E abogado a bisa cu C.E. tabata gana 110 florin pa dia pa camber y no ta gana mas.
El a remarca cu e muhe a gaña cu el a paga 14 mil florin, siendo cu ta menos cu 1 luna el a keda Aruba. Na opinion di abogado, no tin ningun violencia fisico y tampoco menaza verbal di parti di C.E. No ta asina cu C.E. tabata cobra boet di 100 dollar ora cu un muhe ta bay cu cliente for di bar. No tin ningun control haci. E abogado a remarca cu di tur e añanan cu C.E. ta maneha 2 bar, ta solamente un biaha, un grupo di muhe ta haci denuncia. E ta haya cu ningun caminda por saca afor cu C.E. tabata saca placa for di e muhenan. E abogado a mustra cu tin declaracion di otro muhenan cu ta bisa cu no mester a paga boet di 100 dollar. Nan mes por a dicidi kico tabata cobra e cliente. Solamente mester paga 110 florin pa dia. No tin ningun buki cu ta mustra cu C.E. tabata cobra boet di 100 dollar of e 10 florin pa cada cliente.
E abogado a bisa Hues cu e no ta haya cu C.E. tabata pone presion riba e muhenan pa gana placa riba nan cabez. Na opinion di e abogado, C.E. no tabata obliga e muhenan pa haci prostitucion. Ta nan ta dicidi cu kende nan ta bay den camber. Na opinion di abogado, tres muhe no tabata contento pasobra negoshi di prostitucion no a bay manera nan a kere y nan a bay haci denuncia. El a pidi Hues pa declara C.E. liber. Pa loke ta demanda di daño, el a pidi Hues pa rechaza e demanda. C.E. a bisa Hues cu e ta sinti su mes hopi kibra. Semper e tabata trata e muhenan bon. El a bisa cu el a perde su negoshi ya e tin 7 luna cera.
Hues a cera tratamento di e caso y 31 October lo tin sentencia.
