Hues ta hay’e culpabel
ORANJESTAD (AAN): Diabierna mainta Hues a bisa cu e ta haya e acusado S.K. di 59 aña, culpabel di tur e 8 acusacionnan y a confirma e exigencia di Fiscal, 10 aña di prison. Hues no a persigui S.K. pa tres pistol y tampoco e municionnan cu tabata den kluis.
Culpabel di abusa dos mucha muhe: Hues a bisa cu en total tin 8 acusacion contra S.K. di cual 6 ta tocante e abuso sexual di e dos mucha muher R. y W. durante un tempo largo.
E di 7 acusacion ta tocante di posesion di pornografia infantil y e di 8 acusacion ta tocante e posesion di 6 armanan di candela y mas di 600 bala cayente.
Dia 19 September 2025 tratamento di e caso a tuma lugar y Fiscal a exigi 10 aña di prison pa S.K. Hues a ricibi di e acusado S.K. su defensa di ta desmenti tur acusacion di abuso di e muchanan y ta bisa cu e declaracion di e muchanan no creibel. S.K. a bisa cu el a cumpra e pornografia di mucha pero no por a habri esakinan.
Hues ta haya S.K. culpabel di a abusa di e muchanan R. y W. Hues a bisa cu e ta haya e declaracion di e dos muchanan confiabel. Na opinion di Hues, e muchanan R. y W. a declara cu nan tabata hunto ora cu S.K. a abusa di nan.
Pa loke ta pornografia infantil, Hues a mustra cu S.K. a bisa cu el a cumpra nan pero no por a habri e filenan. Hues ta haya esaki increibel. Hues a bisa cu e ta haya S.K. culpabel di tabatin pornografia di mucha.
Culpabel pa 3 arma so: Pa loke ta posesion di 6 arma di candela y balanan, Hues a mustra cu 5 pistol ta di club di tiro y e revolver ta di un amigo cu a fayece cu e documentonan di e arma ainda no ta regla. Hues ta haya cu S.K. tin permiso pa arma y no pa castiga S.K. pa 3 arma. Esaki ta e pistolnan cu tabata warda den kluis hunto cu e balanan. Hues ta haya cu esakinan ta cumpli cu e reglanan poni den e permiso.
Hues ta haya S.K. culpabel pa e dos pistolnan cu tabata pafor di e kluis pasobra aki S.K. no a cumpli cu e reglanan di e permiso, esta cu armanan di candela mester ta warda den kluis. Hues ta haya S.K. culpabel tambe pa e revolver, pasobra ainda e formalizacion di e permiso di e revolver no ta cla.
Castigo di 10 aña di prison: Pa cu e castigo, Hues a bisa cu e ta haya cu S.K. a tacha integridad di e muchanan. Esaki ta afecta e muchanan den nan bida. Hues a mustra cu e mayornan di e muchanan R. y W. a declara den Corte cu nan yiu a keda afecta y cu nan ta hayando tratamento.
Hues a sigui bisa cu pa combati pornografia di mucha, mester actua contra esnan cu ta cumpra e videonan.
Pa loke ta e armanan di candela, Hues a bisa cu no ta acceptable cu S.K. a pone 2 pistol pafor di e kluis. Hues a mustra cu tin video caminda ta mira e mucha R. tabata hunga cu un arma. Esaki ta sumamente peligroso.
Na opinion di Hues, e exigencia di Fiscal ta na su lugar. El a condena S.K. na 10 aña di prison, kitando e tempo cu S.K. ta cera den KIA.
Hues a aproba e demanda di daño di 9.654 Florin di banda di mayornan di R., y 3.575 Florin di banda di mayornan di W. Aki Hues a pone e medida di pago contra S.K. pa paga esakinan.
