E tin apenas 18 aña
ORANJESTAD (AAN): Diahuebs mainta e hoben masculino D.H. di 18 aña, a presenta dilanti Hues pa scucha su sentencia. E ta worde acusa cu riba 25 di Mei 2025, el a purba di mata e homber P., door di manda auto cu velocidad halto riba P., kende tabata para patras di su Scooter. Tambe D.H. ta worde acusa di tabatin arma di candela.
Den sala di Corte tabata presente e mayornan di D.H. y e homber P. Por a mira cu e homber P. ta mucho mas grandi den estatura compara cu D.H.
Intento di mata cu auto: Hues ta haya legalmente proba cu D.H., dia 25 Mei 2025 a purba di mata e homber P. Hues a bisa cu a mira e video di security cu a graba tur cos. A pasa e video aki durante tratamento di e caso. Hues a bisa cu por a mira cu D.H. a bay cu e auto cu velocidad riba e scooter y e homber P. El a dal den e scooter y e homber P. a bula un banda.
Despues P. a coy un machete y bay riba e auto. D.H. y un ocupante a sali for di e auto. Por a mira cu e ocupante tabatin algo den su man. E momento ey, por a mira cu P. a spanta y a core bay y un dama bisti na cora cu a sali pafor, tambe a spanta y core bay.
Hues a mustra cu D.H. a bisa cu e tin rabia riba e homber P., y a tuma venganza door di dal e scooter di P. cu e auto. Hues a bisa cu e pregunta ta, si por papia aki di intento di mata. Pa conclui esaki mester puntra si D.H. a mira P.
Na opinion di Hues, D.H. a bisa Polis cu el a mira P. ta cana bay for di e Scooter. Sinembargo P. tabata net mey-mey di e Scooter y un muraya ora cu D.H. a manda e auto riba e Scooter. Hues a bisa cu riba imagennan di e video di seguridad, por a mira tur cos. Esey ta mustra cu D.H. a mira P.
Culpabel di intento di mata: Hues a mustra cu ta conoci, cu si auto dal un hende, e por mat’e. Na opinion di Hues, door di core cu velocidad halto y dal contra e scooter, P. a tuma e chens cu e por a mata P.
Den e caso aki, Hues ta haya ‘intento di mata’ proba. Na opinion di Hues, e no ta haya proba cu D.H. tabatin un arma di candela den su man. Apesar cu P. y e dama a bisa cu a mira D.H. cu un arma. Polis sinembargo a haya huls di bala den e auto. Tabatin potretnan di arma den smartphone di D.H.
Hues ta haya cu D.H. culpabel di intento mata.
Castigo: Pa cu e castigo, Hues a bisa cu e ta tene cuenta cu D.H. tabata menor di edad ora di incidente. Esey kiermen cu mester aplica e castigo hubenil. Hues ta haya cu D.H. mester di ayudo psicologico pa evita cu e ta haci algo similar atrobe.
Hues a mustra cu anteriormente D.H. a worde condena pa posecion di arma di candela y a haya castigo combina. D.H. a haci e delito aki den su tempo di prueba y atrobe tin arma envolvi.
Hues a bisa cu e ta agrega e 10 luna condicional di e castigo anterior, acerca di e castigo cu e ta condena D.H. El a condena D.H. na 15 luna di prison, di cual 10 luna ta condicional cu un tempo di prueba di 3 aña. E tempo di prueba. Durante e tempo di prueba, D.H. ta cay bao guia di Reclassering. Esey ta nifica cu en total, D.H. a haya 15 luna di prison.
Hues a bisa cu e demanda di daño di P. pa cu e scooter, lo worde aproba. Hues a ordena D.H. pa paga 3 mil Florin y a pone medida di pago. Hues a bisa tambe cu e auto confisca pa Polis, lo mester debolbe na e mama di D.H. y e cantidad di huls confisca lo worde destrui.
