Apesar cu el a wordo declara liber di e acusacion di labamento di placa
ORANJESTAD (AAN): Diahuebs e señora Colombiano A.R. (64) a wordo declara liber di e acusacion di labamento di placa pero a wordo haya culpabel di no a declara na Aduana cu e tabatin 27 mil Dollar y 1500 Euro cu e tabata viaha cu ne pa Colombia.
E acusacionnan cu Fiscal a presenta den sala di Corte contra A.R. ta: (*) Riba 13 Maart 2024, el a laba placa, esta 27.000 Dollar y 1.500 Euro. (*) Riba 13 Maart 2024 e no a declara na Aduana cu e tabatin 27 mil Dollar y 1.500 Euro cu ne.
No a declara placanan na Aduana: Hues a puntra A.R. si e ta keda mantene su ultimo declaracion haci na Polis. A.R. a bisa cu e no ta corda. Hues a mustra cu A.R. a declara cu tur e placanan ta di dje. Hues a bisa cu promer A.R. a declara cu e no tin nada. Segun A.R. e dia ey, Aduana no a puntr’e nada. Aduana a yam’e pa listra su maleta, na momento cu e tabata bay viaha pa Colombia. El a bisa Hues cu el a splica Aduana cu e tabatin 60 pa 70 dollar cun’e pa e bay Bogota. Hues a puntra A.R., cuanto placa e tabatin.
Segun A.R., mas di 22 mil dollar. Hues a bisa cu Aduana a bisa cu A.R. a bisa cu e tin 1500 dollar so. Ora Aduana a check den e maleta, a bin haya cantidad di placanan lora den elastic parti rond den e maleta. A.R. a bisa Hues cu tur e placanan tabata den su maleta y parti na diferente lugar. El a bisa cu ora bo viaha pa Bogota, Colombia, bo no por tin sumanan grandi na bo curpa pasobra si nan horta bo, bo ta perde tur cos.
Segun A.R., el a yega di wordo horta na Colombia y a perde tur placa. Pesey e no ta cana cu hopi placa cu ne sino den su maleta. A.R. tambe a bisa Hues cu e no a bisa 1.500 Dollar sino 1.500 Euro y cu e 1.500 Euro no ta di dje sino cu e tabata hiba e placa aki pa un persona na Colombiano cu su siguiente dia lo viaha pa Spaña.
Con a yega na 27 mil Dollar: Hues a puntra A.R., con el a yega na 27 mil Dollar. Segun A.R., el a spaar placa pa yega na e suma aki pa asina e por bay haci operacion na Colombia. El a bisa cu ademas di e negoshi cu e tin di busca cos for di Colombia pa hende, e tabata bende cuminda y snacks. Tambe el a bisa Hues cu el a haya herencia di su tata cu a fayece na Colombia.
A.R. a duna Hues actanan di Notario na Colombia, cu ta splica cu e herencia di e tata a wordo parti den e rumannan y e yiu homber di A.R. a busca e placa na Colombia y trece pa A.R.
Despues di a analiza e actanan, Hues a mustra cu Notario a parti e placa di herencia di e tata di A.R. na Colombia. E actanan ta mustra cu A.R. a haya mas o menos 8 mil dollar. Segun A.R., despues cu el a wordo deteni na aeropuerto, el a pidi Notario pa e actanan. Na April 2024, A.R. a haya e actanan cu ta mustra cu el a haya 8 mil dollar. A.R. a bisa Hues cu el a haya e placa di herencia hopi promer cu 13 Maart 2024.
Castigo: Hues, despues di a scucha Fiscal, kende ta haya A.R. culpabel di labamento di placa y abogado mr. Falconi, a dicta sentencia di biaha. Hues ta haya cu A.R. ta culpabel di no a declara na Aduana e 27 mil Dollar cu e tabatin cu ne y tambe cu A.T. ta culpabel di a transporta 1500 Euro pa un hende na Colombia. Hues a declara A.R. liber di e acusacion di laba placa. Hues a condena A.R. na 30 ora condicional, di trabao pa comunidad y cu e 27 mil Dollar y e 1.500 Euro lo keda confisca.
