Fiscal ta haya tur 4 sospechoso culpabel y a exigi entre 2 y 3 aña di prison
ORANJESTAD (AAN): Mañan Diabierna 28 Februari 2025, Hues di Corte den Promer Instancia lo dicta sentencia den e caso penal cu Ministerio Publico a cuminsa contra e hombernan: J.B., L.C., G.G. y R.E. Tratamento di e caso a sosode algun siman pasa caminda Fiscal ta haya nan culpabel cu riba 7 Juni 2024 a trafica 700 gram di cocaina den blekinan di Ensure. Na Postkantoor a hiba cahanan pa manda Hulanda y Douane a intercepta esaki.
Cocaina den blekinan di ensure: Hues a cuminsa cu J.B., kende ta esun cu a hiba e cahanan Postkantoor den cual tabatin blekinan Ensure cu cocaina. Hues a puntr’e si el a hiba anterior caha na Postkantoor pa manda Hulanda. J.B. a bisa cu el a yega di hiba un biaha caba pa R.E. pero no ta corda e dia. Segun J.B. el a wordo paga pa hiba e cahanan pero no tabata sa cu ta droga.
El a bisa cu ora el a cay sera, Polis a bis’e cu den e cahanan tabatin droga. E ora ey el a admiti. E cahanan tabata riba su nomber. Hues a remarca cu el a wordo paga. Segun J.B., el a haya 500 florin y a kere cu esey tabata pa paga pa e cahanan y loke resta ta p’e. El a bisa cu ta durante trabao el a core haci e fabor. Hues a puntra J.B. si el a check e cahanan. J.B. a bisa Hues cu el a mira den cahanan cu tabatin blekinan di Ensure y otro cosnan pero no a pensa cu lo por tin droga den esakinan.
Polis a forza sospechoso papia?: Hues a mustra cu den e di tres declaracion, J.B. a bisa cu el a gaña na Hues Comisario cu e no tabata sa cu tin droga. El a pidi sorry. J.B. a bisa Hues cu esey no ta berdad y cu ta Polis tabata insisti cu e tabata sa cu tin droga den e cahanan.
Hues a lesa otro declaracion caminda J.B. lo a bisa cu R.E. a bis’e cu no tin problema pasobra el a laga empaketa e cahanan bon. J.B. a desmenti. Hues a bisa cu el a firma e declaracion. Segun J.B., el a firma pa no haya problema.
Otro sospechosonan ta nenga: Hues a puntra R.E. si e tabata envolvi den mandamento di e cahanan cu droga. R.E. a bisa Hues cu e no tin nada di haci den e caso aki. Segun R.E., e unico cos cu e sa, ta ora un Colombiano a bin su cas ora e tabata corta cabey. E persona ta G.G. kende a pidie pa hiba cahanan p’e. Segun R.E., el a bisa G.G. no y J.B. tabata eynan cortando cabey. El a bisa cu e momento ey J.B. no a bisa nada.
Hues a bisa cu G.G. ta bisa cu 2 biaha R.E. lo a hiba cahanan. R.E. a desmenti y a bisa cu ta 1 biaha so G.G. a bin cerca dje y el a nenga di manda cahanan pa G.G. Hues a lesa un declaracion di R.E. na Polis caminda el a bisa cu 2 biaha J.B. a manda cocaina liquido pa G.G. R.E. a desmenti categoricamente di a declara esey. El a keda para riba cu 1 biaha so G.G. a pidie pa manda un caha cu comestibles y el a nenga.
Hues a lesa declaracion di R.E. na Polis caminda e ta bisa cu e conoce G.G. hopi tempo y cu G.G. a bis’e cu e ta manda droga Hulanda pa hopi tempo. Hues a bisa cu R.E. tambe a bisa Polis kendenan ta envolvi y mas detayes. Hues a remarca cu R.E. ta bisa cu e no a bisa nada di esey pero R.E. su firma ta para bou di e declaracion.
Scucha combersacionnan di droga: Hues a bisa cu Polis a haya combersacionnan riba WhatsApp entre R.E., G.G. y L.C. caminda ta papia hopi di droga.
Hues a puntra G.G. si e tin algo di haci cu e caso. G.G. a desmenti. El a bisa cu e no conoce e hendenan den e caso. Hues a mustra cu tin combersacionnan riba cellular. G.G. a bisa cu e cellular no ta di dje. Hues a bisa cu tin voice note caminda Polis ta reconoce e stem di G.G. E sospechoso G.G. ta para riba cu e no ta envolvi. El a bisa cu den pasado e tabata envolvi den droga pero no awor. El a bisa cu hendenan ta gaña riba dje.
Hues a puntra L.C. si el a manda cahanan cu droga. Segun L.C., e no a manda nada cu droga Hulanda. Hues a puntr’e si el a yega di guli bolita. L.C. a nenga. Hues a mustra cu tin combersacionnan di R.E. cu un otro caminda ta bisa cu L.C. lo a guli bolitanan. Despues di hopi puntramento di parti di Hues, L.C. a bisa cu el a hiba un caha pa R.E. na Postkantoor y a post esaki y cu tur cos tabata na orden. Hues a bisa cu L.C. lo a declara cu dos biaha el a bay busca caha cerca G.G. y cada biaha el a haya 400 florin. Segun L.C., el a bay hiba cahanan pa R.E. y a haya placa pa paga e gastonan y e resto tabata p’e. Segun L.C., ora el a wordo deteni, el a wordo manipula door di Polis pa e duna declaracion. Segun L.C., e no conoce G.G. y J.B. E conoce R.E. El a admiti di a hiba cahanan pa R.E. y a haya placa. Segun L.C., loke a sobra di e 400 florin cu R.E. a dun’e pa paga pa e gastonan di manda e cahanan, tabata p’e. El a kere cu e placa ta pa su gasolin y su tempo.
Hues a mustra cu R.E. tin carchi di castigo caminda el a yega di wordo condena den pasado pa droga. Hues a mustra cu G.G. tambe tin carchi di castigo cu caso di droga na 2012.
Fiscal ta haya tur culpabel: Fiscal a bisa cu 7 Juni 2024 a intercepta caha cu cocaina den blekinan Ensure. En total 700 gram di cocaina a saca for di e liquido. A mira J.B. riba video na Postkantoor y a detene y interog’e. Fiscal a bisa cu R.E. tambe a duna declaracion amplio. E promer caha a wordo manda April – Mei 2024. Fiscal a remarca cu awor den Corte tur hende ta nenga y cu ta Polis ta gaña. El a mustra cu tur e declaracionnan ta firma pa e sospechosonan. Fiscal a mustra cu ta bou huramentacion e miembronan di Narcotica a traha e relatonan di declaracionnan. Fiscal ta haya cu R.E. tabata e intermediador entre G.G. y J.B. Pa loke ta G.G., Fiscal ta considera G.G. e organizador cu a prepara e cahanan. Fiscal a bisa cu tin combersacion entre G.G. y J.B. caminda G.G. ta puntra J.B. su nomber y adress pa pone riba e cahanan. Fiscal a mustra cu G.G. ta desmenti tur cos tanto na Polis como den Corte. E ta bisa cu e no conoce R.E. y J.B.
Pa loke ta L.C., tin declaracion di R.E. cu ta mustra cu L.C. a manda 2 caha Hulanda. L.C. mes a duna declaracion amplio cu el a manda 2 caha pa R.E. y G.G., Hulanda. L.C. mes a bisa cu cada vez el a haya 400 florin pa manda cahanan. El a bisa cu den e cahanan tabatin blekinan di Ensure.
Fiscal a bisa cu cada vez tabata mas o menos 700 gram di cocaina den liquido den cada caha. Fiscal ta haya cu J.B. y L.C. tabata mula, R.E. tabata e intermediador mientras cu G.G. tabata e organizador.
Fiscal a exigi pa J.B. 24 luna di prison di cual 12 luna ta condicional cu 3 aña di prueba. Fiscal a exigi pa R.E., 30 luna di prison, pa G.G. 36 luna di prison y pa L.C. 24 luna di prison di cual 12 luna ta condicional cu 3 aña di prueba. Fiscal a pidi pa e cellular di R.C. y G.G. keda confisca. Hues a bisa cu dia 28 Februari, e lo dicta sentencia.
