E padrastro a bisa Hues cu e no ta un abusador
ORANJESTAD (AAN): E homber Venezolano di inicial G. di 24 aña di edad, bibando indocumenta na Aruba, Diaranson mainta a scucha Fiscal exigi 4 aña di prison p’e. Fiscal ta haya proba cu G. a abusa di su yiu muher di Crianza E. di 15 aña.
Abogado mr. Emerencia ta haya cu no tin prueba. E ta haya cu e DNA tabata contamina. E acusacion cu Fiscal a presenta contra G. ta cu riba 6 Mei 2024, el a abusa di e mucha muher E., kende ta yiu muher di e pareha di G., e dama J. Subsidiario Fiscal a acusa G. di a haci actonan inmoral cu e mucha.
Ta asina cu e dama J. tabata presente den sala di Corte pa scucha e caso y a presenta un demanda di daño perhuicio.
Viola mucha: Hues a puntra G., kico e tin di bisa di e acusacion. Segun G., esey ta absurdo, y cu nada di esey no ta berdad. El a bisa cu nunca el a haci E. algo. Hues a mustra cu den e raport di KZP por lesa cu dia 8 Mei 2024 e tanta di E. a bay haci denuncia contra G.
Despues E. mes a presenta na Polis. El a bisa cu 6 Mei 2024 e tabata hunto cu G. den camber di G. pa skirbi carta pa su mama J., kende tabata encarcela den KIA. J. tabata sera den KIA pa a hinca G. diferente biaha cu cuchiu na April 2024. Esey a haci cu G. a keda cu e yiunan di J.
Segun G. e yiunan tabata keda cerca e tanta y e dia 6 Mei 2024 e mucha muher E. y su ruman homber, tabata den e apartamento di G.
Acusado ta nenga: Acusado G. a bisa cu el a skirbi e carta pero E. a dun’e e papel y pen. Esaki tabata den e camber di G. Segun G., E. a keda un rato y despues a bay. Hues bisa cu segun E., G. a bay riba dje, cuminsa sunchi na su curpa. E. a declara na KZP cu G. a bis’e pa kita su paña pero E. a nenga. G. a keda pasa man y kita paña di E. Na dado momento el a penetra E. Segun E., el a sinti hopi dolor y G. a bis’e no worry. Na dado momento e ruman homber a yama E. y G. a stop. G. a bay lock e porta di camber y a bay masturba riba E.
- su reaccion riba e declaracion di e mucha E. ta cu esey ta absurdo. Hues a bisa cu E. a bisa cu el a conta su ruman homber kico G. a haci cun’e y e ruman homber a bis’e pa conta e tanta. Hues a bisa cu a haya DNA di G. na e panty y e short di E.
- a desmenti cu e pañanan ta di E. El a bisa Hues cu ora el a mira potret di e pañanan, e ta sigur cu e pañanan no ta di E., sino e mama J. Hues a puntra G. pakico E. ta bay gaña cu e pañanan ta di dje. G. a bisa Hues cu esey e ta puntra su mes. El a bisa cu e sa cu e tanta tin hopi rabia riba dje.
Hues a bisa cu e tanta a declara cu E. tabata cerca dje y a mira cu E. cu wowo yen di awa ,a bis’e kico G. a haci. E tanta a manda mensahe via WhatsApp pa G. mustrando cu e mester sera e porta di camber na lock y ora cos pasa pa bis’e. Hues a remarca cu con G. a keda asina hopi tempo sin bisa nada y despues a papia cu su ruman muher. Desde Mei 2024, G.ta sera y na September 2024 el a conta su ruman muher y a bis’e pa pidi un testigo declara na su fabor. Segun G., e tabatin berguenza pa conta e mama J. G. a bisa Hues cu e kier ta bon cla cu e no tin un abusador.
Fiscal a haci G. preguntanan tocante e pañanan di E. Segun G. el a mira e potret di e pañanan y e ta sigur cu eseynan ta di e mama J. y ta e tanta a coy esakinan. Fiscal a remarca, con e tanta lo sa cu riba e pañanan ey tin DNA siendo cu segun experto, bo no ta mira nada di masturbacion cu wowo. Ta ora a haci investigacion forensico, a haya esaki.
Demanda daño: E mama J. a haci demanda di daño. El a bisa cu su yiu E., tin mester di tratamento psicologo y a keda cu trauma. En total el a demanda 22.500 Florin cu ta encera daño inmaterial y daño material. Hues a puntra J. con ta bay cu su yiu E., el a bisa cu e yiu ainda ta afecta. E mucha no kier mira G. El a bisa cu su yiu ta studiando bon na school.
Hues a mustra cu G. ta indocumenta na Aruba y ta haci trabao di barbero. El a bisa cu G. a declara na Polis cu e ta na Aruba debi na situacion financiero na Venezuela.
Fiscal a exigi 4 aña di prison: Fiscal a bisa Hues cu e ta haya cu e padastro G., a abusa di su yiu di crianza E. di 15 aña.
Fiscal a bisa cu e ta haya cu tin suficiente prueba di sosten. E ta haya e declaracion di E. consistente y ta haya E. su declaracion confiabel. El a bisa cu E. tabata cerca G. pa skirbi un carta pa su mama J. cu tabata sera den KIA. E momento ey, G. a abusa di e mucha. E mucha a bisa kico tur a sosode. E ruman homber e declara kico E. a bis’e di loke G. a haci y cu E. tabata casi yora. Despues E. a bay conta su tanta.
Fiscal a bisa Hues cu ora E. a duna declaracion na KZP y na Hues Comisario, e tabata hopi emocional. Fiscal no ta haya e declaracion di testigo di parti di G. confiabel pasobra e ruman muher di G. a bay acerca e testigo pa declara pa yuda G. Fiscal ta haya cu G. a abusa di su posecion como padastro di e mucha. El a mustra cu ta un hecho cu muchanan ta keda afecta pa tempo largo despues di abuso. Fiscal a exigi 4 aña di prison, kitando e tempo cu G. ta sera den prison.
Paga un parti di daño: Pa loke ta e demanda di daño, Fiscal ta haya cu no tin splicacion riba e demanda material y pesey ta pidi Hues pa declara esaki no admisibel. Pa loke ta e demanda di daño inmaterial, Fiscal a bisa cu e mucha E. a keda afecta. E ta haya cu por aproba 5 mil Florin pa daño inmaterial.
El a sigui bisa cu ta keda e oportunidad pa e mama J. por cuminsa un caso civil den Corte. El a pidi Hues pa impone medida di pago contra G.
Abogado: mr. Emerencia a bisa Hues cu e pareha J., a ataca G. cu cuchiu y G. a keda cu cicatriz. E ta haya esaki esencial pa e caso aki. E ta haya cu e acusacionnan contra su cliente no ta cuadra. E abogado ta haya cu no tin prueba y e investigacion forensico no por worde haya como prueba. E abogado ta haya cu e declaracion di e ruman homber no ta consistente. E abogado a bisa Hues cu10 luna largo G. a nenga e acusacionnan y ta bisa cu ta absurdo.
E abogado a sigui bisa cu G. a colabora cu e investigacion aunke esey lo por perhudik’e. E abogado a bisa Hues cu G. a skirbi un carta riba peticion di e mama di J. pa asina yuda cu J. ta worde saca for di KIA.
- Emerencia a bisa Hues cu ta increibel cu e ruman homber no a scucha ni mira nada, siendo cu e porta di camber tabata habri. Ta te anochi e ruman homber ta mira su ruman muher E., cu wowo na awa ta bisa cu G. a abusa di dje. E abogado ta haya cu tin declaracionnan no consistente y esey ta haci cu e declaracionnan no ta confiabel. E abogado a cuestiona e DNA riba masturbacion. Na opinion di abogado, tanto G. como e mucha E. sa cu e pañanan ta di e mama J.
E abogado ta haya cu e investigacion no ta completo. E abogado a mustra cu tin un di tres DNA riba e paña. Esey ta mustra cu e DNA a worde contamina. E ta haya cu a fabrica prueba pa perhudica G. E abogado ta haya cu no tin prueba convicente y cu mester declara G. liber. E ta di opinion cu no por papia cu tabatin penetracion. E abogado a pidi Hues pa no accepta e demanda di daño material. Pa loke ta e demanda inmaterial, tambe e ta haya cu mester declara no admisibel. El a bisa cu e mama lo por cuminsa un caso civil.
Despues di reaccion di Fiscal y abogado, e acusado G. a bisa Hues como ultimo palabra, cu e “no ta un abusador”.
Hues a sera tratamento di e caso y a bisa cu 26 Maart 2025 pa 8.15 am lo tin sentencia.
