A pesar cu e acusado a keda afecta di e accidente y no ta corda nada
ORANJESTAD (AAN): Diaranson mainta e homber E.Q.O. di 21 aña a presenta den Corte pa Hof di Corte Superior trata e apelacion contra E.Q.O. su sentencia.
Dia 8 Maart 2024, Hues di Corte den Promer Instancia a condena E.Q.O. na 9 aña di prison pa intento di asesinato y posesion di arma di candela riba 5 Februari 2023. Procurador General (PG), riba Diaranson a exigi pa Hof mantene e 9 aña di prison.
Acusado no ta corda nada: Hof a puntra E.Q.O., pakico el a apela contra e sentencia. Segun E.Q.O., e ta haya cu Hues di Corte di Husticia no a tene na consideracion cu e tabata pa basta tempo den coma. E ta haya cu e no mester a haya castigo. El a bisa cu te awe, e no ta corda nada di kico a pasa. Por a nota cu E.Q.O. no tabata rasona bon.
Hof a bisa cu por ta E.Q.O. no ta corda nada pero el a haci cosnan cu no ta corecto. Hof a mustra cu esaki ta un caso hopi serio. Den e caso di tiramento di 5 Februari 2023, tabatin 4 hende den e auto Mazda den cual E.Q.O. tabata sinta patras, banda di M. Ta asina cu tres: E.Q.O., E.C.A. y D.S.H. ta actualmente sera den KIA relaciona cu e caso aki y tur tres a worde condena na 9 aña di prison pa intento di asesinato y arma di candela.
Tiramento pa venga asesinato: Hof tabata haci E.Q.O. diferente pregunta pa haya un imagen di kico a pasa dia 5 Februari 2023, pero E.Q.O. cada vez tabata bisa cu e no ta corda nada. Hof a bisa cu for di relato di Polis por compronde cu tabatin un competencia entre 4 hende di Madiki y 3 hende di Dakota. Hof a mustra cu for di e auto Mazda den cual E.Q.O. tabata, a tira riba e auto MG di esnan di Dakota, den cual e homber S.M. tabata. Dos di e 3 ocupantenan di e MG a resulta herida door di e tiramento.
Tabatin un accidente tambe relaciona cu e tiramento, caminda tanto e Mazda como e MG a dal contra un muraya banda di Kinderhuis Imelda Hof na Noord. Segun E.Q.O. e no ta corda nada. Hof a mustra cu E.Q.O. a resulta herida door di e accidente y hende a hib’e hospital caminda el a keda 9 dia den coma.
Hof a cuestiona e hecho cu for di e Mazda coriendo, a tira riba e MG cu tambe tabata coriendo, cual ta sumamente peligroso. Hof a bisa cu Corte den Promer Instancia ta haya proba cu E.Q.O. tambe a tira riba e auto. Hof a mustra cu recientemente E.Q.O. a papia cu Edwin cu ta sera den KIA pa e caso aki. Segun E.Q.O., Edwin a bis’e cosnan pero Edwin no sa di nada. Segun E.Q.O., e tabata sinta patras y Edwin a bis’e yen di cos pero e no por corda nan. Hof a puntra E.Q.O. si e conoce Lalo Webb y E.Q.O. a bisa cu e ta su primo cu ta morto.
Hof a sigui bisa cu na Polis un di esnan di e grupo di E.Q.O. a conta cu E.Q.O. tin problema cu e homber S.M., kende a mata Lalo Webb. Hof tambe a bisa cu Edwin a bisa cu e origen di e problema ta E.Q.O. y S.M. Hof a mustra cu 9 Maart 2015, Lalo Webb, kende tabata miembro di gang Madiki, a worde tira den cabez mata.
Hof a bisa cu Corte den Promer Instancia a bay hopi profundo den e caso aki caminda ta mustra cu tabatin un plan. Ta asina cu e aña aki tin algun testigo interoga relaciona cu e caso aki. Tin un testigo a bisa cu no ta asina cu E.Q.O. a tira. Un otro testigo a bisa cu E.Q.O. no a tira. Un otro testigo a bisa cu Edwin tabatin plan pa mata S.M. y cu E.Q.O. tambe a tira. Tambe e testigo a bisa cu no tabata e intension pa a dal contra e auto MG den cual S.M. tabata.
Acusado ta menos responsabel pa e tiramento: Hof a bisa cu E.Q.O. no tin carchi di castigo. Hof a bisa cu Psychiater a traha un raport di E.Q.O. caminda e ta mustra cu E.Q.O. no ta corda hopi cos, door di e accidente. Psychiater ta haya cu E.Q.O. ta menos responsabel pa su actonan y cu E.Q.O. ta dispuesto pa haya guia di Reclassering pa e recupera.
Psicologo ta comparti punto di bista di psychiater. Tambe psicologo a mustra cu E.Q.O. ta rabia riba e otro acusadonan pasobra nan no ta splik’e kico a pasa. Psicologo ta preocupa cu E.Q.O. a bisa cu ora e sali, e ta bay biba serca su mama. Esey segun psicologo ta na e mesun bario, esta Madiki y cu E.Q.O. lo bay topa cu e mesun amigonan. Segun E.Q.O. e no tin motibo pa bay papia cu e amigonan.
PG ta exigi pa mantene 9 aña di prison: Procurador General (PG) a bisa Hof cu 5 Februari 2023 den oranan di mainta tempran, Polis a bay banda di misa Santa Ana na Noord, pa un accidente. Dos auto, un Mazda y un MG a dal contra e muraya di Kinderhuis Imelda Hof y e auto MG tabatin masha hopi impacto di bala. Polis a bay hospital y a detene hende. Investigacion a mustra cu tabatin tiramento y a detene e trio di cual E.Q.O ta forma parti.
Hues a condena E.Q.O. y dos otro na 9 aَña di prison. Na opinion di PG, den e Mazda, dos tabatin arma di candela cu a tira riba e MG. Polis a constata 8 impacto di bala riba e MG y 2 tiro den windshield. A haya 11 huls di bala riba caminda. Investigacion ta mustra cu e Mazda a sera e MG den cual S.M. tabata sinta. Despues a tira for di e Mazda riba e MG.
PG ta haya cu e apelacion no ta funda y a exigi pa Hof mantene e sentencia.
Abogado: mr. D. Croes a bisa Hof cu enberdad tabatin un accidente y E.Q.O. a dal su cabez y a worde hiba hospital caminda el a bay den coma. E abogado a bisa cu E.Q.O. a keda afecta y no ta corda nada mas. Na cas, mayornan mester a mara E.Q.O. pasobra e no ta bij y tabata sali for cas sunu. E abogado a bisa cu E.Q.O. mester a haya terapia pero esey no a sosode. E otro dos den auto a worde deteni.
Actualmente den KIA, E.Q.O. no ta hayando tratamento. E ta sigui sinti malo. E abogado a bisa Hof cu e famia no ta reconoce E.Q.O. como e E.Q.O. cu nan tabata conoce.
E abogado ta haya cu Hues di Corte di Husticia a condena E.Q.O. na 9 aña di prison sin tene cuenta cu e situacion di E.Q.O. despues di e accidente. Na opinion di abogado, no por prueba cu E.Q.O. a tira. El a bisa Hof cu ta hopi dificil pa comunica cu E.Q.O. pasobra e no ta corda nada. E.Q.O. no ta corda nada kico a pasa y e no ta kere cu e lo a tira manera ta acus’e. E abogado a sigui bisa cu ta un hecho cu si bo no ta corda un hecho castigabel no kiermen cu bo no ta castigabel. E hecho cu bo no ta corda nada, bo no por defende bo mes y otronan por tira culpa riba E.Q.O.
E abogado a mustra cu e ocupante M. cu tabata sinta banda di E.Q.O. den e auto Mazda, ta bisa cu E.Q.O. a tira. Segun e abogado, e hecho cu a haya polvora di tiro riba E.Q.O., no kiermen cu el a tira. E por bien ta cu otro a tira y door di e accidente, polvora a plama y contamina tur den auto. E abogado a bisa cu no tin seguranza cu E.Q.O. a tira y tampoco por bisa cu e ta complice. Abogado ta haya cu no por bisa cu E.Q.O. a tira y ta haya cu mester declara E.Q.O. liber. Tambe e abogado a bisa Hof pa tene cuenta cu segun raportnan di psychiater y psicologo, E.Q.O. ta menos responsabel. El a caba bisando cu E.Q.O. no ta e E.Q.O. di antes.
Hof a sera tratamento di e caso y a bisa cu lo bay studia e caso y por spera sentencia 10 November 2025.
