Aunke cu psychiater ta bisa cu e ta menos responsabel pa su actonan
ORANJESTAD (AAN): E acusado Jennifer Gonzalez di 40 aña, a scucha Procurador General (PG) bisa cu apesar cu tin raport di psychiater y psicologo cu ta mustra cu Gonzalez tin problema mental, e ta haya Gonzalez culpabel di a provoca asesinato di Sergio Maduro na Matividiri. PG a exigi pa Hof mantene e 18 aña di prison.
Diamars practicamente henter dia, Hof di Corte Superior a dedica na tratamento di e apelacion di Gonzalez contra su condena di 18 aña di prison. Dia 27 September 2024, Hues den su sentencia a bisa cu e ta haya cu Gonzalez a provoca asesinato di su pareha Sergio Maduro y a priminti pago na Bryan Jimenez Mello. Riba e anochi di 23 pa 24 December 2023, Bryan a mata Sergio.
Acusado ta nenga tur cos: PG ta acusa Gonzalez di a priminti Bryan pago pa mata su pareha Sergio. Segun Gonzalez e ta inocente y cu e no a paga ningun hende. Hof a mustra cu tin raport di psychiater cu a evalua Gonzalez. Por a nota cu Gonzalez tin problema mental y cu Hof tabata papia na un manera special cun’e. El a admiti cu Sergio tabata biba cun’e.
Gonzalez a conta Hof cu Sergio hopi biaha ta pidi’e pa nan haci sex den trio y ora e nenga, Sergio ta grit’e y bis’e cu e no ta sirbi pa nada. Segun Gonzalez, e tabata grita Sergio back. El a bisa cu Sergio a yega di gar’e na su garganta. Tambe el a bisa cu Segio ta mand’e cumpra marihuana. Segun Gonzalez ta via Sergio, el a conoce Bryan. E tabata laga 2 cacho serca Bryan y tabata hiba cuminda pa e cachonan. Gonzalez a bisa cu e mester haci sex cu Sergio y Bryan.
Hof a mustra cu segun investigacion di Recherche, Gonzalez tabata keha di Sergio. Gonzalez a admiti esey y a bisa cu nunca el a bisa hende pa mata Sergio.
Hof a mustra cu un homber G. a bisa cu el a conoce Gonzalez, kende a pidi’e un lift. Na Polis G. a declara cu Gonzalez a bis’e cu e ta fada di Sergio y cu e mester paga tur cos. Tambe el a bisa cu Gonzalez lo a bisa cu e kier mata Sergio. Gonzalez a desmenti esaki. Hof a mustra cu un homber K. kende ta traha hunto cu Segio a bisa cu Sergio a yega di cont’e cu Gonzalez a purba di venen’e. Hof a mustra cu Gonzalez tabata mira programa na television riba matamento. Un dama a bisa cu Gonzalez lo a bisa cu e tabata studia con pa elimina Sergio.
Hof a puntra Gonzalez, pakico el a paga Bryan. Gonzalez a bisa cu el a paga Bryan 150 Florin pasobra e dos cachonnan a kibra cos na cas di Bryan. Un colega di Gonzalez lo a duna Bryan e placa. Hof a bisa cu segun e colega di Gonzalez, e placa no tabata pa e cachonan. Hof a mustra cu Bryan a declara na Polis cu el a mata Sergio. Gonzalez a bisa cu ora el a tende esey, e no por a kere. Hof a mustra cu Bryan a declara cu riba peticion di Gonzalez, el a mata Sergio y ta pesey Gonzalez a dun’e placa. Gonzalez a nenga tur esaki y a bisa cu el a duna Bryan placa pa e cachonan.
Hof a mustra cu investigacion a mustra cu Gonzalez a yama Bryan diferente biaha despues cu Sergio a worde mata. Gonzalez a admiti esey, pero a desmenti cu el a yama Bryan tocante e morto di Sergio. El a bisa cu e tabata yama Bryan pa saluda. El a bisa cu despues Bryan a bis’e cu el a mata Sergio. Hof a mustra cu for di investigacion por compronde cu Gonzalez diripiente por bira hopi rabia mes. Hof a remarca cu ta straño cu manera cu Sergio a muri, Gonzalez a tira tur e cosnan di Sergio afor. Gonzalez a reacciona cu ta e señora S. a bis’e pa tira tur cos afor pa kita mal energia y cu S. mes a yuda haci esey.
Hof a mustra cu Bryan a declara cu riba peticion di Gonzalez el a mata Sergio y cu e lo haya 2 mil Florin. El a bisa cu el a haya un adelanto di 150 Florin. Gonzalez ta para riba cu e 150 Florin tabata pa e cachonan.
Hof a remarca cu for di e declaracionnan di hendenan ta mustra cu ta Gonzalez kier a mata Sergio y Gonzalez ta nenga tur esaki y ta bisa cu nan ta gaña. Gonzalez a bisa Hof cu e no sa pakico nan ta bisa asina. Hof a puntra Gonzalez si ta berdad cu el a bay cu Bryan na un bancomatico pa saca placa cu e carchi di Sergio. Gonzalez a nenga.
Durante interogacion di Hof, Gonzalez a expresa cu por bien ta cu den su rabia e lo por a expresa cu e kier pa Sergio muri pero no cu esey tabata su intension. Gonzalez ta para riba cu e no a bisa Bryan pa mata Sergio. El a bisa cu e no sa pakico Bryan ta bisa esaki. Hof a remarca cu ariba e anochi di 23 pa 24 December 2023, Byran a mata Sergio y 5 biaha Bryan a yama Gonzalez. Hof a puntra pakico Bryan a yama. Segun Gonzalez, nan no a papia nada di e matamento di Sergio sino saluda otro. Hof a remara cu un dia y mey promer cu e matamento, Diez biaha Gonzalez a papia cu Bryan. Pakico a papia en total 1 ora largo cu Bryan? Segun Gonzalez, nan tabata papia normal cu otro pero nada di Sergio.
Hof a remarca cu Bryan ta conta un cos completamente diferente. Gonzalez a bisa cu por ta cu Bryan tabata loco. Hof a mustra cu tambe Gonzalez a yama hopi biaha Bryan. Gonzalez ta para riba cu ningun momento el a pidi hende pa mata Sergio. El a bisa cu por bien ta cu den su rabia e lo a bisa cosnan pero e no a pidi hende pa mata Sergio.
El a bisa cu Sergio tabata papia cune pa haci video di sex pa gana placa. Nan tabata bay hunto San Nicolas y tin biaha ta bay busca muher pa haci sex den tres.
Menos responsabel pa su actonan: Hof a mustra cu tin raport di psychiater y psicologo cu ta splica e bida di Gonzalez y tambe kico a sosode. Gonzalez lo a expresa cu e no kier tin nunca mas relacion cu hende cu ta pidi’e pa haci cosnan cu e no kier. Hof a bisa cu psychiater ta conclui cu Gonzalez no tin educacion.
Tambe cu door di no tin suficiente educacion, ta dificil pa Gonzalez pidi ayudo pa cualkier cos. Psychiater ta haya cu ta dificil pa Gonzalez a planea tur e asesinato aki. Psychiater ta haya cu Gonzalez ta menos responsabel pa su actonan. Psychiater ta haya cu Gonzalez mester di ayudo y guia.
Pensa manera mucha chikito: Psicologo ta haya cu Gonzalez ta sinti solitario (sinti su so) pasobra e no ta compronde mundo. E ta considera cu Gonzalez tin mentalidad di un mucha di 6 of 7 aña. Psicologo ta haya cu Gonzalez mester di ayudo ora e sali liber. Tambe e psycologo a mustra cu si Gonzalez kier algo, e kier esey e momento ey. E no tin pasenshi pa warda. E no ta controla su emocionnan. Psicologo ta mustra cu Gonzalez lo por tuma decisionnan hopi drastico, of tur cos of nada.
Procurador General: PG a declara na Hof, cu nunca antes el a yega di experiencia un caso asina complica den su carera. Riba e anochi di 23 pa 24 December 2023, Sergio Maduro a worde asesina na un forma hororoso. A pasa auto riba dje pa laga mustra cu ta un accidente a sosode. Pa solamente 2 mil Florin Bryan a mata Sergio Maduro. Door di declaracion di Bryan a haya sa cu ta Gonzalez a provoca e morto di Sergio Maduro, door di ofrece pago.
Na opinion di PG, e hecho cu a ofrece pago pa mata, ta suficiente pa considera provoca asesinato. Patologo a constata cu tin marca di tire di auto na curpa di e victima. El a mustra tambe cu Gonzalez a purba saca placa for di ATM Machine cu debit card di Sergio despues cu el a worde mata, pero no a logra.
PG ta haya cu tin suficiente prueba cu ta Gonzalez a provoca e asesinato di Sergio Maduro. PG a remarca cu apesar di ta handicapped, Gonzalez tabatin 10 aña trahando na Wendy’s. PG a bisa cu e ta tene cuenta cu raport di psychiater y ta exigi pa confirma e sentencia di 18 aña di prison.
Abogado: mr. D. Croes a bisa Hof cu e ta haya cu mester declara Gonzalez liber. El a mustra cu e capacidad mental di Gonzalez ta di un mucha 6 – 7 aña. Segun abogado, Sergio tabata exigi Gonzalez haci cosnan cu Gonzalez no tabata kier. Abogado a bisa cu Gonzalez tin berguenza di bisa cu e tabata worde forza pa tene relacion sexual den tres. El a bisa cu ta duel’e cu Sergio a worde asesina. E abogado a mustra cu Bryan tambe ta sufri di problema mental y cu por bien ta cu el a interpreta Gonzalez robez. E testigo homber P. a bisa Polis cu Bryan a bis’e di a mata Sergio Maduro.
E abogado a mustra cu Bryan mes a declara cu e ta sufri di diferente personalidad. E ta haci cosnan cu despues e no ta corda. El a bisa cu Bryan no tin yiu sino ta un dama color cla tin un yiu y Bryan tin den su cabez cu e mester mantene e yiu y pesey tabatin mester di placa. E abogado a bisa cu Bryan mes a declara den Corte cu e no a mata Sergio riba peticion di Gonzalez sino cu ta door cu Sergio a falta respet pa su mama. El a bisa cu e no tabatin planea di mata Sergio. El a bisa cu el a tuma placa di Gonzalez pero no tabata bay mata Sergio pa Gonzalez.
E abogado ta haya cu door di e problema mental, Bryan a asesina Sergio. E abogado a bisa cu Bryan ta kere cu e ta un maton y a bisa cu tin 15 morto dera na Parke Nacional
E abogado a conclui cu Gonzalez no a provoca e asesinato di Sergio y ta haya cu mester declara Gonzalez liber. El a mustra cu psychiater mes ta bisa cu Gonzalez ta menos responsabel pa su actonan.
Hof a sera tratamento di e caso y a bisa cu dia 10 November 2025 lo tin sentencia.
