A regresa di tratamento obligatorio na Hulanda y ta bolbe cay cera
ORANJESTAD (AAN): Despues di a sigui 2 aña di tratamento obligatorio na un institucion na Hulanda, Zuriel Celaire ta bolbe Aruba y awor ta sera pa amenaza cu arma. Ta asina cu Celaire ta den KIA caminda ainda e acusado primordial di fam Principaal ta encarcela relaciona cu e lamentable caso caminda el a tira Sayuri Petronia mata. Den e caso ey Celaire tambe tabata presente na Flamboyanstraat 4 riba fecha 4 Juni 2021 ora cu e tiro accidental a los y mata Sayuri.
Intento di asesinato riba 4 persona: Dia 15 Juli 2022, Hues a dicta sentencia den e casonan penal contra Zuriel Celaire. Hues a bisa cu e ta haya legalmente proba cu dia 22 Mei 2022, Celaire a participa den un asalto arma riba 2 persona na Brazil, 30 Mei 2021 hunto cu Principaal a tira riba 4 persona banda di American Bar. Hues a considera esaki di ta complice intento asesinato. Celaire tabata esun cu a tira y Principaal tabata na stuur. Tambe Hues a haya Celaire culpabel di posecion di arma di candela y bala.
Hues a sigui mustra cu riba 10 Januari 2020, Celaire a bringa cu e homber d.M. y maltrat’e, 14 Januari 2020, Celaire a menaza e homber H. cu cuchiu cu lo mat’e. Hues tambe ta haya proba cu riba e anochi di 4 Juni pa 5 Juni 2021, Celaire tabatin hunto cu Principaal un arma di candela, caminda Sayuri a fayece.
Tratamento obligatorio: Hues pa cu e castigo a mustra cu Celaire a tira riba 4 persona y danki Dios ningun a fayece. Hues a tene cuenta cu e raport di psicologo y e raport di psychiater, kendenan ta haya cu Celaire por wordo influencia liher y pesey e no ta completo responsabel pa su actonan. Ambos a conseha Hues pa pone Celaire den un institucion.
Hues a dicidi cu e ta aplica castigo hubenil y bou guia pa evita cu Celaire ta bolbe wordo influencia. Hues a sigui e conclusion y conseho di psicologo y psychiater y a ordena pa Celaire haya tratamento obligatorio na Hulanda, cu ta na bienestar di Celaire mes. Hues a ordena cu Celaire lo mester keda 2 aña den un institucion na Hulanda y despues lo mester evalua si mester prolonga tratamento of no.
Deteni pa menaza cu arma: Si mira cu e sentencia tabata di Juli 2022, por conclui cu apenas Celaire a caba e tratamento obligatorio, el a bolbe Aruba y atrobe ta cay den man di husticia. E siman aki, Celaire a presenta dilanti Hues Comisario, cu vigilancia estricto di KIA. Su detencion a keda prolonga pendiente investigacion.
Lo bira interesante dia di tratamento di e caso penal contra Celaire, pa mira kico ta e pensamento di Fiscal y Hues.
