Abogado mr. Kock ta cuestiona
ORANJESTAD (AAN): E tratamento di e caso di Izak Principaal, culpabel di a tira mata Sayuri, a dura oranan largo caminda Procurador General a exigi 8 aña di prison y tambe tratamento obligatorio pa Principaal.
Den e articulo aki ta publica e punto di bista di abogado mr. A.Kock di Principaal.
Cuatro aña sin haya tratamento: Mr. Kock a bisa Hof cu el a keda asombra cu tur loke PG a trece padilanti. E abogado a bisa Hof cu tur e delitonan cu Principaal a haci, e tabata hunto cu Zuriel Celaire. E abogado a bisa cu Principaal tabata stuur y Celaire tabata esun cu a tira riba hendenan dilanti un bar na San Nicolas.
El a remarca, unda Celaire ta awor. Na opinion di e abogado, Celaire a influencia Principaal. Ta Celaire a hiba e pistool na e cas unda Sayuri a wordo tira. Na opinion di mr. Kock, ta door di un accidente un tiro a los cu consecuencia fatal.
Viola trata caso husto: E abogado a mustra cu Celaire a haya solamente tratamento obligatorio y ainda Principaal ta sera den KIA. E ta haya cu e publicidad cu e caso a haya den media, a crea e impresion den comunidad cu Principaal ta un asesino. E abogado a bisa Hof cu Sayuri tabata manera un ruman di Principaal y e no tabatin motibo pa mata Sayuri.
E abogado ta haya cu di trata Principaal otro cu Celaire, ta viola e principio di tratamento di caso husto. El a bisa cu te ainda no tin un conclusion den e caso aki. Principaal mes a expresa cu e tin 4 aña sera, sin tratamento y te ainda no tin claridad den su caso.
E abogado a puntra PG si kier pa Principaal keda sera? Hof a hala mr. Kock su atencion cu Hof a tuma decision caba cu Principaal a tira intencional y no tabata un accidente.
Pakico castigo di adulto: mr. Kock a remarca na Hof cu biaha pasa a condena Principaal na castigo hubenil y awor diripiente ta papia di castigo di adulto. Na opinion di abogado, ta logico cu Principaal ta crece pero no ta corecto cu ta bay aplica castigo di adulto.
E abogado a remarca cu door di miedo pa critica di media, Hues den Promer Instancia a condena Principaal na 9 aña di prison y awor PG ta exigi castigo pisa.
Duna tratamento obligatorio: mr. Kock a pidi Hof pa impone castigo di tratamento obligatorio den un clinica (TBS) cu condicion manera ta para den e raport di Respaldo. Esey ta trece cu ne cu Principaal ta wordo laga liber y di biaha e team di Respaldo ta atende y tambe Reclassering. E abogado a sigui bisa cu ora presenta un chens na Hulanda, lo manda Principaal Hulanda pa tratamento.
Hof a bay evalua un rato y a dicidi cu Diaranzon lo cera tratamento di e caso y Diaranzon 17 Dec, 1:45’or di merdia lo tin sentencia.
