E acusado ta admiti cu el a tira Sayuri mata
- Corte Superior ta atende e caso un biaha mas
ORANJESTAD (AAN): Hof di Corte Superior a trata e caso di Izak Principaal, cu a dura hopi. Masha hopi cos a wordo papia pa cu e castigo cu lo mester castiga Principaal cu a tira Sayuri mata. Ta asina cu abogado di Principaal mr. A.Kock a apela e sentencia di Hof y Corte Supremo a manda e caso bek y cuestiona cu e castigo no tabata corecto. No por condena Principaal na 9 aña di prison y tambe tratamento obligatorio den un clinica. Por a mira tata di e victima Sayuri cu un yiu homber sinta den Corte pa scucha e caso.
Hof a bisa cu na December 2003, Corte Supremo di Hulanda a manda e caso bek y awor ta bay trata solamente e parti di castigo. Hof a mustra cu Principaal a wordo condena pa varios caso, esta asalto arma cu violencia, drive by shooting na un bar den San Nicolas. Esakinan Principaal a haci hunto cu otro. E lamentable caso caminda Principaal a tira Sayuri Petronea , tabata su so. Esaki a sosode 4 Juni 2023.
Castigo hubenil of castigo adulto: Hof a bisa cu tin hopi raportnan traha riba Principaal. Hof a puntra Principaal kico e ta pensa di e raportnan. Principaal a bisa cu e sa cu el a haci malo y cu lo bin castigo pisa. Hof a mustra cu awor e raportnan ta papia cu mester aplica castigo adulto y no castigo hubenil. E castigo hubenil no ta cuadra cu e delitonan cu Principaal a haci.
Segun Principaal, el a haci e delitonan den su hubentud y ta haya cu e ta wordo castiga pa e tempo ey. E tempo ey e tabatin 17 aña. Hof a bisa cu tin diferente cosnan cu mester bay tene cuenta promer cu yega na un castigo: si Principaal mester tratamento, si e kier bay school y cu Principaal a bisa cu e kier bay traha. Segun Principaal, awor cu den KIA e por haya preparacion, e kier bay traha.
Condicionnan severo stipula: Hof a mustra cu expertonan ta bisa cu Principaal mester di tratamento pa su problema mental. Nan tambe ta bisa cu tin ora Principaal ta bisa cu tratamento no ta necesario y tin ora e ta bisa cu e ta haya cu e mester tratamento. Hof a bisa cu e pregunta ta, na unda e tratamento mester tuma lugar. Hof a bisa cu Aruba ta hopi limita den e tipo di tratamento. E lugar ideal lo ta Hulanda. Principaal a bisa cu si e tin cu bay Hulanda pa tratamento, e lo bay.
Hof a mustra cu tanto Reclassering na Aruba como Hulanda, a stipula reglanan estricto si Principaal mester haya tratamento. Tambe ta asina cu e chens ta existi cu Principaal lo mester keda den un clinica pa un tempo y bou vigilancia. Na Hulanda e clinica ta encera detencion y tratamento. Esaki, tanten cu Reclasering ta haya necesario. Un di e condicionnan tambe ta cu Principaal no por bay bek serca amigonan bieu entre otro Celaire, kende tabata hunto cu Principaal den caso di tiramento na e bar den San Nicolas y tambe ora cu Principaal a tira mata Sayuri. Principaal tampoco por anda cu amigonan den e mundo di droga. Tambe tin condicion cu Principaal no por papia con cu ta na cellular of computer. Lo controla cu kendenan e ta papia. Lo averigua si ta amigonan bieu. Reclasering a pone condicion tambe cu Principaal lo mester duna e pass word pa e computer y cellular pa por controla.
Hof a sigui bisa cu segun e raportnan, si Principaal no cumpli cu e condicionnan aki, lo tin consecuencia cu Principaal lo mester haya tratamento obligatorio den un clinica.
Cuatro aña sera sin haya ningun tratamento: Principaal a bisa Hof, cu e tin 4 aña sera y no ta mira nada pa futuro. El a bisa Hof cu el a mira hendenan cu ta cay sera y ta haya libertad. Despues nan ta bolbe cay sera. Principaal a bisa cu e no kier esey. E kier un cambio pasobra e no kier keda den e situacion cu e ta. E kier coopera pa asina e mira un desaroyo positivo. El a bisa cu e ta haya dificil cu e tin cu tuma pildernan den un clinica sera.
Hof a remarca cu si Principaal no sigui tratamento, e chens tey cu e ta bolbe bay haci malo. Principaal ta compronde esey. E tres Huesnan di Hof a cuestiona e hecho si Principaal ta bay Hulanda, si e por papia Hulandes. Principaal a bisa Hof cu e ta compronde Hulandes y por papia un poco. Ta asina cu Hof a pidi e traductor pa hala for di Principaal. Sin cu e traductor tabata sinta banda di Principaal, Hof a papia cu Principaal pa mira si realmente e ta compronde. Principaal a bisa Hof na Hulandes cu e ta compronde Hulandes un poco.
Procurador General (PG) na su turno a enfatisa cu Principaal mester compronde cu esaki ta un asunto serio pasobra si e no resulta, e ta perhudica Principaal mas. El a puntra Principaal pakico e kier tratamento. Principaal a bisa cu e no por papia hopi cu hende pasobra e ta bira nervioso. PG a bisa cu e ta bay mas leu cu solamente papia y cu Principaal mester tuma remedinan pa su problema mental. Principaal a bisa cu e ta dispuesto pa haci esaki pa pasa over e tempo dificil. Por a mira cu Principaal a baha cabez y a expresa cu e ta sorry loke a pasa.
Exigencia di PG: PG a bisa cu dia 4 Juni 2021, Sayuri a wordo tira mata door di Principaal. Desde 4 Juni 2021, Principaal ta sera y en espera di un decision. Famia di e victima tambe kier un fin den esaki. PG a bisa cu Principaal a haci delitonan serio. Corte Supremo a destrui e sentencia di Hof pasobra Hof a condena Principaal na dos castigo. E tempo ey Principaal tabatin 17 aña caminda a usa e castigo hubenil. PG a siugi bisa cu Principaal tabata envolvi den un drive by shooting y despues e tira mata di Sayuri. Dos biaha e mesun arma a wordo usa.
Mester aplica castigo di adulto: PG a bisa Hof cu Psychiater a papia cu Principaal e aña aki y Psychiater ta haya cu mester usa castigo di adulto. PG a mustra cu Psycologo, for di 2022 a bisa cu mester atende cu Principaal como adulto. E aña aki e Psycologo a bolbe evalua Principaal y ta keda mantene su punto di bista.
Ta asina cu a constata cu Principaal tin un actitud anti-social. PG ta haya cu mester considera Principaal como adulto. Na opinion di PG, e meta di castigo ta pa evita cu delitonan serio ta bolbe sosode. Tambe pa manda señal den comunidad cu no ta tolera tipo di comportacion asina. PG a sigui bisa cu e meta di castigo tambe ta pa paga pa e delito cu el a haci. PG ta haya cu ta hopi complica pa yega na un castigo pa Principaal.
Tratamento den clinica: El a mustra cu desde Juni 2021 Principaal ta sera den KIA y no a haya ningun tratamento. Door di tur e tempo aki e problema anti social di Principaal a bira mas serio. PG ta haya cu Principaal mester haya tratamento den clinica pa asina mira cambio den actitud di Principaal. Esaki por cu of sin condicionnan. Na opinion di PG, castigo di prison so, no ta e solucion pa Principaal.
E ta haya cu tratamento na Hulanda den un clinica lo ta esencial, pero e pregunta ta si Principaal lo ta dispuesto y si Principaal lo por cumpli cu e condicionnan. PG ta haya cu Principaal mester wordo poni na disposicion di Hulanda pa haya tratamento obligatorio. Tratamento obligatorio ta mas o menos 4 aña. Tratamento cu condicionnan lo por dura 6 aña. PG a bisa cu tabatin combersacionnan cu autoridadnan na Hulanda pa esaki por sosode. PG a exigi 8 aña di prison y banda di esaki tratamento obligatorio pa Principaal. PG a bisa cu subsidiario e ta exigi e tratamento obligatorio den un clinica cu condicionnan cu ta pa 6 aña.
Hof despues di a scucha defensa di abogado mr. A. Kock, a bay evalua un rato y a bolbe. Hof a bisa cu dia 17 December 2025 pa 1:45’or di merdia lo tin sentencia.
