ORANJESTAD (AAN): Diabierna mainta Hues a confirma e exigencia di Fiscal y a condena e homber J.W. di 34 aña na 18 luna di prison.
Acusado J.W. ta wordo haya culpabel di a horta 11 airco nobo for di un container di un compania.
Horta airconan: E acusacion contra J.W. ta cu riba 22 Augustus 2025, el a forza un container di un compania y a horta 11 airco nobo nobo den caha. Hues a bisa cu tin video di camera di seguridad caminda ta mira bon cla con J.W. a forza un container y a bay cu 11 airco.
Hues a puntra J.W. pakico. Segun J.W., el a bin cu e storia cu “el a perde trabao y tabatin debenan pa paga” y mester mantene su pareha y su baby di 1 aña. E ta admiti di a haci malo.
Hues a mustra cu segun relato di Polis, for di e video ta mustra cu J.W. no tabata su so sino cu tin un otro persona cu a yud’e. E forma con e ladronicia a sosode, ta mustra cu tur cos tabata planea. Segun J.W., e tabata su so y no tabata planea. Hues a puntra kico J.W. su intension tabata. Segun J.W. su intension tabata pa bende e airconan pa yega na placa.
Recidivista di ladronicia: Hues a bisa cu segun e carchi di castigo, J.W. a yega di cay sera caba pa casonan di ladronicia. Hues a bisa cu tin castigonan severo cu J.W. a haya y a bisa cu J.W. sa kico ta e consecuencia di esaki.
Segun J.W., door cu su situacion na cas no tabata mucho bon, el a bay horta. El a bisa Hues cu el a haya trabao awor y asina e sali liber di KIA e por bay traha.
Fiscal: Fiscal a bisa cu e ta haya legalmente proba cu J.W. a horta 11 airco den caha for di e shipping container. Fiscal tambe a mustra cu tabatin un otro hende envolvi. Pa cu e castigo, Fiscal a bisa cu e ta tene cuenta cu J.W. anterior a haya castigo caba pa hortamento. Fiscal a exigi 18 luna di prison pa J.W.
Abogado: Abogado mr. Arends Marchena a bisa Hues cu J.W. ta un conoci di Polis y cu J.W. a admiti di a haci malo. E abogado a bisa Hues cu e ta haya cu tin aspectonan importante den e caso. El a mustra riba e situacion cu J.W. tabata aden. E abogado a bisa Hues cu J.W. a perde trabao y tin pareha y baby di 1 aña pa mantene. E situacion di perde trabao a pone cu J.W. a bay horta. E abogado a bisa Hues cu J.W. no tabatin nada planea y a bay horta un cantidad di airco pa por paga debenan.
Entretanto J.W. a haya trabao y asina e sali liber, e por bay traha. E abogado ta haya e exigencia di Fiscal halto di mas. El a pidi Hues pa duna un castigo husto. E abogado ta kere cu castigo combina y trabao pa comunidad lo ta na su lugar pa asina J.W. por bay traha y asina mantene su famia.
Sentencia: Hues a sera tratamento di e caso y a dicta sentencia di biaha. Hues ta haya legalmente proba cu J.W. a horta un cantidad di airco for di un container di un compania. Na opinion di Hues, e ta mustra mas un ladronicia planea y no algo cu diripiente J.W. a haci. Hues a bisa cu esaki ta un caso serio.
Pa cu e castigo, Hues a bisa cu e ta tene cuenta cu J.W. tin condena caba pa ladronicia pero no ta siña. Esaki ta haci cu no tin espacio pa castigo combina. Hues a bisa cu e ta haya e castigo exigi pa Fiscal na su lugar. Hues a condena J.W. na 18 luna di prison, kitando e tempo cu e ta sera den KIA.
