Hues ta señala den sentencia: -ORANJESTAD (AAN): Manera DIARIO a publica, e tres miembronan di AVP, a perde nan caso sumario contra Conseho Electoral (Gobierno) pa un reconteo di votonan di eleccion.
E sentencia di Hues ta consisti di 13 pagina y DIARIO por a constata cu den su evaluacion, Hues ta señala practicanan cu AVP a haci cu ta castigabel pa ley. Ademas Hues ta mustra tambe cu no por exclui cu un forma di presion a worde haci riba votadornan di AVP.
OFRECE PLACA PA VOTA:
Hues den su evaluacion ta mustra cu segun e di dos lid di articulo III.4 di ley pa cu eleccion di miembronan di Parlamento, e votacion mester ta secreto y cu e eleccion mester tabata husto.
Na opinion di Hues, den luz di tur esaki, mester evita cu den cualkier forma cu e votador ta worde poni bou di presion of e votador ta sinti’e obliga pa vota pa un cierto partido y/of candidato y cu e votador mester demostra un prueba pa kende of cual partido el a vota.
Den e caso di potret cu votadornan a saca ora cu nan a yena e carchi di voto, no por exclui cu e potretnan ta destina como prueba na e partido of candidato cu a haci promesa di pago si realmente a vota pa e partido y/of candidato.
PRACTICA CASTIGABEL PA LEY:
Hues ta mustra cu e tipo di practica aki, ta castigabel pa ley. Esaki ta para bon cla den articulo 2:44 di Codigo Penal.
Ademas Hues ta mustra cu e tipo di practica aki ta haci cu no por papia di un eleccion husto.
VIOLA SECRETO DI VOTO:
Hues den su evaluacion ta sigui mustra cu e sacamento di potret di con votadornan a vota riba e carchi di voto, ta un violacion di e exigencianan poni den Constitucion.
Den Constitucion ta para cu mester tin secreto di voto y e sacamento di potret di carchi di voto ta un violacion asina serio cu no por accepta esaki como prueba cu AVP kier a presenta cu lo tabatin irregularidad.
Esakinan ta algun di e señalamentonan hopi serio cu Hues di Corte di Husticia di Aruba ta mustra cu AVP a usa durante eleccion.
