Nan a apela nan sentencia - ORANJESTAD (AAN): Corte Superior a atende e apelacion di tur e 11 miembronan di tripulacion abordo di e barco Aressa,
riba cual a haya 5108,6 Kilo di cocaina. E caso a bin dilanti pro forma y Hof di Corte Superior a fiha un otro fecha pa bolbe ta pro forma.
GUARDA COSTA A INTERCEPTA BARCO: E sentencia di e caso aki tabata na Februari 2021, caminda Hues a mustra cu ta door di Marina Colombiano, Guarda Costa a haya informacion cu e barco Aressa tin un lote di cocaina. Guarda Costa a intercepta e barco Aressa ora esaki tabata navega den awanan territorial di Aruba y … BINGO. Den e cuatro di machine a haya den un tanki, 211 bulto di cocaina cu a pisa 5108,6 Kilo.
E barco Aressa a sali for di Punto Fijo cu intension pa bay Grecia cu e lote grandi di cocaina.
TRIPULANTE NO TA UN AGENTE: Hues a duna su opinion riba e discusion di abogadonan mr. Lejuez y Polat cu Fiscal no ta admisibel door cu a wanta documentonan intencional atras pa perhudica e sospechosonan. Hues no ta haya esey proba. Hues a sigui bisa cu e no ta haya proba tampoco cu lo tabatin deal cu e hefe mecanico M.D. pa duna declaracion. Tampoco cu e lo ta un agente poni pa scucha e sospechosonan.
Hues ta di opinion cu aki no por papia di cu Fiscal a viola norma. Hues a rechaza e ponencia di e abogadonan cu mester declara Fiscal no admisible. Ta asina cu M.D. a worde condena na 9 aña di prison.
TUR TABATA SA DI E 5 MIL KILO DI COCAINA: Hues a bisa cu despues di a scucha e grabacion cu abogadonan a facilita, e no tin ningun motibo pa duda den declaracion di M.D. El a bisa cu e declaracion di M.D. a haya sosten den e otro pruebanan. Tambe cu M.D. ta involucra su mes den e traficacion di e mas cu 5 mil Kilo di cocaina. Hues ta haya e declaracion di M.D. confiable y ta use como prueba.
Segun M.D., tur e sospechosonan tabata sa na Punto Fijo cu lo bay transporta mas cu 5 mil Kilo. Tur tabata sa cu e saconan cu a wordo poni abordo tabata contene cocaina. E intencion tabata pa hiba e droga Grecia.
CAPITAN A HAYA MAS CASTIGO: Hues a mustra cu e capitan Z.D. tabatin contacto cu esnan di e droga y unda mester hiba esaki. Hues ta haya proba cu e capitan ta culpable di importacion, exportacion di droga. El a remarca cu siendo capitan di e barco, Z.D. no por bisa cu e no tabata sa cu e tabata navega den awa territorial di Aruba. Hues a bisa cu e no ta kere cu e droga a wordo poni abordo na rio Orinoco manera e capitan a bisa.
Na opinion di Hues, mirando e cantidad grandi di droga cu un balor hopi grandi, e no ta kere cu esnan concerni ta tuma riesgo di envolvi otronan. Hues a rechaza e ponencia di abogado cu door di presion, e capitan no tabatin otro opcion. Pa cu e castigo, Hues a bisa cu e ta tene cuenta cu aki ta trata di mas cu 5 mil kilo.
Cocaina ta malo pa salud di hende. Mirando e cantidad esaki lo ta destina pa traficacion y venta cual ta crea hopi problema di criminalidad pa comunidad. Hues ta haya cu Z.D. a contribui na esaki cu su comportacion. Hues a tene cuenta cu castigo cu Hof ta duna y a confirma exigencia di Fiscal. Hues a condena e capitan Z.D. na 15 aña di prison.
GRUPO DI 9 TRIPULANTE: Pa e grupo di 9 cu a wordo parti den dos, Hues ta haya e grupo complice di e traficacion. Nan tabata sa na Punto Fijo cu lo bay transporta 5 mil Kilo di cocaina. Tur a yuda trece e saconan di droga abordo. Haya nan culpable di a transporta droga. Hues a bisa cu e no ta kere e declaracion di capitan Z.D. cu ta na rio Orinoco e droga a wordo poni abordo.
Pa cu e castigo, Hues tene cuenta cu castigo cu Hof ta duna. Hues a confirma exigencia di Fiscal. El a D.Z., N.M., T.B., A.M., V.R., N.M., Z.G., V.L., y D.M. na 12 aña di prison.
CASO POSPONI: Via video conference Hof di Corte Superior a atende e caso. Hof tabata na Curacao y a dicidi cu e caso ta keda pospone pa 16 December 2021. E dia ey e caso un biaha mas lo ta pro forma. Tur cos ta mustra cu otro aña tratamento di e caso aki lo bay tuma lugar, cual lo bay tuma hopi tempo.
Pa e tratamento den Corte den Promer Instancia, a dura dianan pasobra e acusadonan ta Serbio y mester busca traductor special. Den Corte Superior por spera cu ta e mesun cos lo bay sosode.
