Hues ta señala cu potret saca pa ken a vota ta un violacion di secreto di voto
ORANJESTAD (AAN) – Diaranson den oranan di mainta, Hues di Corte den Promer Instancia a dicta sentencia den e caso sumario cu tres miembro di partido AVP, Dowers, De Meza y Wyatt-Ras a cuminsa contra Gobierno (Conseho Electoral di Aruba) pa haci reconteo. Via mail e sentencia a wordo manda pa e huristanan di Gobierno y e abogadonan mr. D.Croes y mr. Mohamed cu a representa e miembronan di AVP.
E sentencia ta consisti di 13 pagina caminda Hues a bay hopi amplio riba e punto di bista di AVP y e punto di bista di Conseho Electoral, caminda AVP ta para riba pa un reconteo mientras cu Conseho Electoral ta haya cu no tin argumentonan valido pa haci un reconteo. Durante tratamento di e caso a mustra cu di e 58.610 votonan, 890 a wordo declara invalido.
AVP su promer demanda ta reconteo di tur e votonan of subsidiario reconteo di e votonan cu a wordo declara invalido pasobra AVP ta haya cu tabatin iregularidadnan a sosode.
EVALUACION
Hues den su evaluacion entre otro ta mustra cu e ta comparti e punto di bista di Conseho Electoral, cu AVP no a presenta argumentonan valido pa haci un reconteo di votonan.
Hues a cuestiona e hecho cu AVP a presenta na Conseho Electoral, potretnan di votadornan di AVP kendenan a saca potret di nan carchi di voto, pa kende nan a vota. Hues ta haya cu esaki ta violacion di secreto di voto cual ta para den Constitucion. E ta haya cu e potretnan aki no por usa como prueba. El a mustra tambe riba e potret caminda e votador a pinta cora e cara di Eman. Esaki na opinion di Hues, ta contra e reglanan con mester yena e carchi di voto y mester wordo declara invalido.
DECISION
Hues den su sentencia ta conclui cu tur esakinan ta trece cun’e cu e ta haya e decision di Conseho Electoral na su lugar pa no tene un reconteo. Hues a rechaza e demanda di Dowers, De Meza y Wyatt-Ras.
