Chauffeur sin rijbewijs condena pa a dal turista mata cu vehiculo na Savaneta

Accident fatal di December 2023

ORANJESTAD (AAN): Diahuebs mainta e homber J.F. di 34 a؜ña, a presenta dilanti Hues pa duna cuenta pa un caso serio di a dal turista masculino mata cu vehiculo y core bay. Ta asina cu Hues no ta haya cu J.F. intencional a dal e turista di inicial A.B. di 75 aña, pero si cu J.F. a core bay laga e turista cu consecuencia cu el a fayece. Tambe Hues ta haya J.F. culpabel pa tabata core e vehiculo sin rijbewijs y core den un vehiculo cu glasnan hopi scur getint.

   Dal turista mata cu auto: Hues a bisa cu segun e relato di Polis, 1 December 2023 den careda di 7’or di anochi a sosode un accidente tragico riba caminda principal di Green Corridor, como 35 meter pariba di Citgo Savaneta, caminda un pareha turista a worde gedal cu vehiculo tipo SUV, y cu e chauffeur a sigui core bay.

   Polis a constata cu e homber turista A.B. a sufri fractura habri y door di a sangra hopi, a bay den shock y fayece. Su pareha dama no tabata hopi serio herida, pero a wordo hiba Hospital si. Danki na testigonan clave y investigacion di Polis, na un forma relampago a localiza e vehiculo dilanti un cas na Tamarijn (Paradera).  Polis a mustra cu J.F. tabata e chauffeur di un vehiculo SUV tipo Nissan X-Trail cu a dal e pareha turista. Ta asina cu e glasnan y windshield full di e vehiculo ta getint preto.

   J.F. a bisa Hues cu e no a mira e pareha riba caminda. Durante e interogacion di Hues, J.F. a admiti cu e no tin rijbewijs. El a bisa cu e vehiculo no ta di dje sino di un persona cu e tabata drecha e auto p’e. Hues mesora a reacciona, y cu prueba a mustra cu e vehiculo ta di J.F. mes, pasobra e numbernan ta riba nomber di J.F.  Aki J.F. a bisa Hues cu el a pone su nummerplaat riba e vehiculo pa asina e por core e vehiculo y busca piezanan y check di biaha si nan ta fit.  No ta conoci ta unda e por haya pieza cumpra riba un Diabierna anochi 7:10 pm ora cu e accident a socede.

   Core cu velocidad halto: Segun J.F., e anochi ey e tabata core 70 pa 80 km/h. Hues a bisa cu riba e caminda ta permiti core 60 km/h maximo. Hues a puntra J.F. si e no a mira borchi cu ta indica esey. Segun J.F., e no a mira borchi di cuanto mester core. El a bisa Hues, ora el a mira cu e tabata core 80 km/h, el a baha velocidad. El a pasa un auto y despues di un rato el a dal e pareha cu tabata cruzando caminda.

   Segun J.F., el a mira un sombra pero no por a haci nada mas. Hues a bisa cu tin un testigo M. kende a bisa cu na altura di Do It Center Savaneta den e birada, e Nissan X-Trail a pas’e cu velocidad halto y despues a drenta fila back y un rato despues a dal e peaton.  Segun J.F. e tabata den vehiculo cu su yiu chikito cu tabata yora y su pareha. El a bisa cu el a pasa e auto hopi mas promer cu e accidente.

   J.F. a bisa Hues cu e no a mira e pareha riba caminda. El a bisa Hues cu si mira e sla na e vehiculo, e tabata na banda. El a kere cu ta contra un cacho of algo otro el a dal. Hues a puntr’e pakico e no a para. Segun J.F., e no a para pasobra su yiu chikito tabata yora. Hues a remarca pakico e no a para pa wak kico a sosode. J.F. a bisa cu su atencion tabata riba su yiu. Hues a bisa cu awor cu tur cos a sosode, kico J.F. ta pensa. Segun J.F., el a spanta y a core bay. Hues a mustra cu tin testigo a mira J.F. ta traha riba e vendor di e auto y el a bisa cu e ta bay busca su rijbewijs.

   Chauffeur tabata yora di duele: Den Corte, Hues a remarca cu e chauffeur J.F. ta blo papia di su yiu y no ta pensa riba e persona cu el a dal mata. Segun J.F. e no tabata sa cu ta un hende. Ta ora el a yega cas el a scucha esey den noticia. Hues a bolbe puntra J.F. kico J.F. ta pensa awor di e accidente. J.F., na yoramento a bisa Hues cu ta duel’e hopi loke a pasa. El a bisa Hues cu no tin zebrapad caminda e accidente a sosode y e caminda eynan tabata sin luz. Hues a remarca cu si ta asina, lo no tabata mihor pa J.F. a core menos cu 80 km/h? Hues a sigui bisa cu J.F. no a mira pero a brake. Tabatin rastro di brake riba caminda. Hues a mustra cu e pareha di J.F. a bisa cu e tabata riba su smartphone pero el a mira manera un cabez dilanti di e auto y a grita J.F. pa brake. Hues a remarca con por ta cu J.F. ta bisa cu e no a mira nada pero su pareha a mira un hende cu lo tabatin un mucha teni.

   Vehiculo a keda confisca: Hues a bisa cu e vehiculo no tabata asegura. Segun J.F. e vehiculo tabata asegura. Hues a bisa cu documentonan, cu segun relato di Polis y relato di compania di Seguro, e vehiculo no ta aseguro. Ta asina cu e vehiculo a worde confisca.

   Fiscal: Fiscal a bisa Hues cu pa mas o menos 7’or di anochi e accidente a sosode. E pareha turista B. a bin Aruba pa pasa vacacion y e homber B. a fayece.

   Ademas di esey, Fiscal a bisa cu e promer acusacion ta cu door di J.F. su culpa e accidente a sosode cu consecuencia fatal.

   Tinted Windows hopi scur: Fiscal ta haya cu J.F. tabata core cu velocidad 80 km/h cu ta mas cu e 60 km/h cu ta permiti. Un rato promer el a pasa un auto. E glasnan di e Nissan X-Trail y e windshield tabata getint hopi scur. Ademas J.F. no tin rijbewijs. J.F. ta bisa cu e no a mira e hendenan. E amiga di J.F. sinta na banda a bisa cu el a mira sombra di un hende. Na opinion di Fiscal, tin hopi auto ta pasa riba e caminda principal ey y hopi hende tambe ta cruza caminda. Fiscal ta haya cu J.F. a core hopi no responsabel. Fiscal a hasta mustra e grado di tint di e auto riba un papel cu ta practicamente preto.

   No culpa di causa morto di turista: Fiscal a bisa cu e señora turista B. a bisa cu tabatin hopi auto riba caminda y el a lanta man pa auto para pero ningun auto a para. Segun investigacion Forensico, e accidente a sosode riba caminda. Fiscal ta conclui cu e pareha tabata riba caminda. Tabatin rastro di brake ariba caminda. Fiscal ta haya cu como chauffeur di auto bo mester tene cuenta cu hendenan cu ta cruza caminda. Na opinion di Fiscal, tur cos ta mustra cu e pareha turista a bay cruza caminda. Fiscal a bisa cu e no ta haya haya proba cu ta door di culpa di J.F. a dal e pareha turista. Fiscal a pidi Hues pa declara J.F. liber di esaki. Fiscal a sigui bisa cu subsidiario e ta haya J.F. culpabel esta, di a core bay despues di e accidente. Tambe cu J.F. tabata core sin rijbewijs.

   Demanda di daño: Fiscal a bisa cu e yiu di e pareha B. a haci demanda di daño pa cubri gastonan di entiero cu ta algo mas cu 4 mil Dollar. Tambe e yiu a haci demanda di daño inmaterial di 50 mil Dollar pa e pareha cu tambe a worde gedal.

   Core hopi biaha sin rijbewijs: Fiscal a bisa cu por mira claramente cu ta duel J.F. hopi loke a sosode. E tabata yora. Sinembargo Fiscal a mustra cu diferente biaha J.F. tabatin casonan di core sin rijbewijs. Fiscal a tuma J.F. na malo pa esaki. Tambe cu a core cu glasnan getint hopi scur. Fiscal a remarca cu na Aruba tin masha hopi auto ta core cu windshield getint y esey ta hopi peligroso.

   Fiscal a exigi castigo di 80 ora di trabao y 120 ora di trabao pa a core bay.  Tambe pa e keda 2 aña sin rijbewijs y 2 aña castigo condicional. Fiscal a bisa cu e vehiculo mester keda confisca.

   Abogado: Abogado mr. Edwards a bisa Hues cu e accidente a sosode anochi riba un caminda cu no tin suficiente luz. J.F. tabata core cu su famia den vehiculo y sin rijbewijs. Di spanto el a core bay despues di e accidente. Esaki no ta corecto pero ta di compronde. Abogado a bisa cu e ta comparti punto di bista di Fiscal cu mester declara J.F. liber di a ocasiona e accidente.

   E abogado a pidi Hues pa tene cuenta cu J.F. kier traha y mantene su famia y su yiu. Na opinion di abogado, e hecho cu Fiscal ta exigi pa e vehiculo keda confisca, ta hinca J.F. den mas debe pasobra e Nissan X-Trail no ta di dje. Pa loke ta e demanda di daño, e abogado a bisa cu e gastonan di entiero ta real pero no ta haya cu a hustifica e daño inmaterial. El a pidi Hues declara esaki no admisibel. El a bisa cu ta duel J.F. masha hopi cu loke a sosode.

   J.F. a bisa Hues cu ta duel e hopi loke a sosode. Na yoramento el a bisa cu no tabata su intension.

   Sentencia: Hues a sera tratamento di e caso y a dicta sentencia di biaha. Hues ta haya cu ta un accidente tragico y no ta haya cu J.F. tabatin intension den esaki. Hues ta haya J.F. su comportacion di core auto ta peligroso. Hues ta comparti punto di bista di Fiscal riba e punto aki. E forma con a core bay despues di a dal un pareha turista. E bentananan di auto tabata hopi scur getint y tabata core duro. Hues ta haya cu e pareha turista a tuma un decision malo pa cruza e caminda ora tin hopi auto pasando.

   Na opinion di Hues, no por bisa cu J.F. ta culpabel di a causa morto di e homber B. El a declara J.F. liber pa morto door di culpa pero si ta haya J.F. culpabel di a core peligroso, core bay despues di e accidente y core sin rijbewijs y sin aseguro. Hues a tuma J.F. na malo cu e ta sigui core sin rijbewijs. Pa e coremento sin rijbewijs, Hues a condena J.F. na 10 siman di prison di cual 8 siman ta condicional cu un tempo di prueba di 2 aña.

   Hues a bisa cu ta basta cu coremento sin rijbewijs! El a condena J.F. na 2 aña sin por core auto y e vehiculo Nissan X-Trail ta keda confisca. Hues a confirma e exigencia di Fiscal esta 80 ora di trabao of 40 dia cera pa a dal hende cu auto. Tambe Hues a condena J.F. cu e mester paga e daño material di algo mas di 4 mil Dollar. Hues a pone medida di pago. Pa loke ta e demanda di daño inmaterial, Hues a declara esaki no admisibel.