ORANJESTAD (AAN): Hues a haya e homber V. y su amiga, esta e muhe C., culpabel di a viola e dama R.
riba 19 Maart 2024. Hues a condena nan na 2 aña di prison y cu mester paga daño na R.
Pareha ta viola dama: Un salimento riba 18 di Maart 2024 anochi y manece 19 Maart 2024, a caba den violacion. Segun declaracion di e victima R., el a sali cu un amiga dia 18 Maart 2024 y a bay na un Bar na Surfside. Eynan el a bin topa cu un otro amiga C. cu tabata cu su amigo V.
Aki R. a palabra cu C. y V. cu nan lo topa na un otro bar pa despues sigui trip. R. a hiba su amiga cas y despues a bay topa cu su amiga C. cu tabata cu V. Nan a bay na un bar na Noord y despues di eynan, C. a propone na R. cu C. y V. ta hib’e su cas pa laga su auto eynan y nan lo bay cu ne y lo trece bek den oranan di mainta.
E victima R. a bay di acuerdo y na dado momento nan a bay na e apartamento di C. na Meiveld. Na e apartamento, C. y V. a bisa cu nan ta bay den camber. R. a kere cu nan ta bay drumi te mainta y el a bay den camber pa drumi.
Eynan cos a bay robez. R. a bay drumi riba cama y un rato despues C. a drenta den camber y a bay drumi banda R. y a cuminsa caricia y tene relacion. Segun R., e tabata bao influencia y no tabata sa con pa reacciona. C. a sigui y na dado momento el a yama su amigo V. pa tene relacion sexual cu R. Ora cu V. a drenta den camber, el a bay kita paña di R. y R. a bisa cu e no kier. Pero asina mes V. a kita tur su paña y a cuminsa tene relacion sexual cu R.
E rapport ta mustra cu R. a cuminsa yora y bisa cu e tin hopi dolor. Pero asina mes C. tabata insisti pa V. sigui. R. tabata sigui yora y bisa cu e tin dolor. Na dado momento V. a stop. C. a yuda R. haya su pañanan y R. a coy su cellular pa yama su amigo pa bin busc’e. Ora cu e tabata papiando cu su amigo, C. a kita e cellular y a papia cu e amigo. Despues R. a haya su cellular y el a bay for di e apartamento na yoramento. E tabata yama su amigo y su amiga pa yud’e te cu na dado momento e bateria di e cellular a baha.
Un agente di Polis a mira R. sinta na canto di caminda ta yora. Esaki tabata mas o menos 5.30’or di mainta. El a para y puntra R. kico a pasa. E ora ey R. a conta tur cos y e agente di Polis a dicidi di hiba R. hospital y R. a haci denuncia.
Dos testigo scucha: Ta asina cu e amiga di R., e dama A. a wordo interoga como testigo. El a confirma cu e tabata cu R. e anochi ey y R. a hib’e cas pa sigui bay sali cu e amiga di R., C. El a bisa Polis cu R. den careda di 4’or di madruga tabata mand’e WhatsApp y bis’e cu nan tabata force. A. a bisa cu R. a hasta mand’e “location” pa A. bay busc’e. A. a bisa cu R. a yam’e y tabata keda yora y na dado momento comunicacion a kibra y R. no a yama mas.
E amigo di R., e homber G., tambe a wordo interoga como testigo y el a bisa cu 4.57 di mainta riba 19 Maart 2024 el a haya 5 miss call di R. El a manda varios WhatsApp caminda R. ta pidi pa bay busc’e pasobra nan kier forc’e. G. a puntra kende kier forc’e y R. a bisa cu e dama C. kier fors’e y cu nan kier tin relacion sexual cu ne. G. a yama R. pero C. a coy e cellular y no tabata kier pasa R. e cellular.
Fiscal a exigi 3 aña y 6 luna di prison: Fiscal ta haya e pareha V. y C. culpabel di complice di violacion di e dama R. Tambe Fiscal ta haya cu e pareha a abusa di R., kende tabata bou influencia y no tabata por a reacciona y resisti.
Tambe Fiscal ta haya cu V. y C. a haci actonan inmoral cu R. Fiscal a exigi pa aproba e demanda di daño material di banda di R. pa mas di 7 mil florin cu ta inclui, gastonan di abogado. Tambe Fiscal a exigi pa aproba e demanda inmaterial di 10 mil florin.
Hues no kere acusadonan: Ta asina cu e acusadonan V. y C. a nenga di a forza R. tin relacion sexual. Nan ta bisa cu nan tabata vrij cu R. y ora cu kier a tene relacion sexual, R. a bisa no y nan a stop. Hues, den su sentencia a bisa cu e no ta kere nan declaracion.
El a mustra cu V. ta nenga di tabatin relacion sexual cu R., siendo cu investigacion haci na hospital ta mustra cu a haya DNA di V. den e parti intimo di R.
Complice di viola: Hues ta haya V. y C. culpabel di a viola e dama R. Hues ta haya cu V. a satisface su mes y C, sin tene cuenta cu sentimento di R. Hues no ta haya cu e pareha V. y C. tabatin un plan traha pa viola R. Na opinion di Hues, e hecho cu V. a stop ora cu R. a sigui yora y sigui bisa cu e tin dolor, ta haci cu V. y C. ta culpabel di viola. Hues ta haya cu aki a tacha e integridad di R.
Hues ta considera esaki un delito hopi serio cu mester duna castigo di prison. Sinembargo, Hues no ta comparti e opinion di Fiscal cu e victima tabata den un estado cu e no por a reacciona y resisti contra e violacion. Hues ta declara V. y C. liber di e parti di e acusacion aki.
Castigo: Hues a bisa cu e demanda di daño material ta hopi complica ya cu e victima R. a bay Colombia pa haya tratamento psicologico y Hues ta haya cu no tin splicacion pakico esaki no a sosode na Aruba. Hues a rechaza e demanda di daño material pero a bisa cu e victima por cuminsa un caso civil.
Pa loke ta e daño inmaterial, Hues teniendo cuenta cu ariba menciona, a aproba 5 mil florin cu V. y C. mester paga. Hues tambe a bisa cu pa e parti di inmaterial, e victima por cuminsa un caso civil. Hues tambe a bisa cu V. y C. mester paga e gastonan di abogado, calcula na 600 florin. Tambe Hues a impone e medida di pago.
Hues a condena V. y C. na 2 aña di prison, kitando e tempo cu nan ta sera den KIA.
