ORANJESTAD (AAN): E homber K.L. di 19 aña a presenta dilanti Hues pa duna cuenta pa e caso penal cu Ministerio Publico a cuminsa contra dje.
El a wordo haya culpabel di bendemento di marihuana y posesion di 2 arma di candela y balanan. Hues a conden’e na 30 luna di prison y cu e 10 mil florin y smartphone lo keda confisca mientras cu e auto lo wordo debolbe. E dos armanan lo wordo destrui.
Droga y 2 arma: E acusacionnan cu Fiscal a presenta contra K.L. ta cu riba 19 November 2024 el a viola ley di droga y tabatin dos arma di candela y balanan.
Hues a mustra cu K.L. ta wordo acusa di posesion y bende marihuana. K.L. a bisa Hues cu e no a bisa e berdad na Polis. Na Polis el a bisa cu e 22 gram di marihuana cu a haya den su auto ta di dje. Esey ta berdad. Segun K.L., tin hende ta bisa cu e ta bende pero no ta tur loke nan a bisa ta berdad. El a bisa cu e sa bende algun biaha pero no tur biaha manera nan ta bisa. Segun K.L., net promer cu el a cay sera, el a cuminsa bende. Hues a mustra cu tin hendenan cu a bisa cu nan ta cumpra marihuana pa un tempo y tin un ta bisa cu for di 2020 e ta cumpra. Segun K.L., kende tin e alias di ‘Chino’, nan sa cu e ta cumpra cantidad grandi di marihuana pasobra e ta usa hopi marihuana pero no ta asina cu e ta cumpra pa bende.
Hues a confronta K.L. cu declaracion di hende cu bisa cu for di 2023 e ta cumpra for di Chino y 3 biaha pa siman. Un otro a bisa cu for Juni 2023 e ta cumpra for di Chino, 2 of 3 biaha pa siman. K.L. a bisa Hues cu tur dos ta gaña pasobra e tabata sera e tempo ey. Hues a mustra cu tin un otro cu ta bisa cu for di 2020 e ta cumpra 2 vez pa siman for di Chino. Hues a sigui bisa cu un primo di K.L. a bisa cu mas o menos 4 luna e ta cumpra for di K.L. Segun K.L. e no tabata bende su primo sino djis dun’e. K.L. a bisa cu e hendenan ta gaña. E ta kere cu door cu nan tabata spanta, nan a declara asina.
Hues a mustra cu e amiga di e primo di K.L. a bisa cu e tabata bende pa K.L. Segun K.L., e ta duna su primo marihuana y no sa kico e ta haci cun’e.
Hues a bisa cu Polis a haya un pistol na cas di K.L. y K.L. a bisa cu e tabatin e arma pa proteha su mes. El a bisa Hues cu el a busca e arma relaciona cu un caso cu e tabata sera, ora el a sali el a haya menazanan. El a bisa Hues cu el a cumpra e arma pero no tabatin bala aden. Esey tabata mas bien pa broma. Hues a puntr’e si el a tira cu e arma. El a bisa cu ora el a cumpra e arma, el a los tironan cu e arma. Esey tabata pa check cu e arma ta traha bon.
E otro arma, tabata den K.L. su auto. Segun K.L. e arma tabata di un tal R. y el a ward’e den su auto. El a bisa cu e tabatin e arma den su cas un dia promer y un ora promer cu el a wordo deteni, el a pone e arma den auto.
Conoci pa husticia: Hues a mustra cu K.L. tin un carchi di castigo. Ta asina cu den pasado K.L. a wordo castiga na 15 luna di prison di cual 3 luna ta condicional pa arma. Na 2022 tambe el a wordo condena pa posecion di droga. Ainda tin un caso habri di droga. Na 2022 tambe e tabata envolvi den e caso di asesinato na tanki di Savaneta. E tabata stuur e auto caminda Williams a tira mata un otro sinta na banda patras den auto. K.L. a wordo laga liber pero Williams a wordo condena na 17 aña di prison.
Raport di Reclassering ta mustra cu K.L. tabata biba cerca su mayornan y tabata traha cu su tata. Cos tabata bay bon cu su mayornan. K.L. a bisa cu el a cuminsa ta mas pega cu su mayornan y scucha di nan. Hues a remarca cu asina mes, toch K.L. ta keda cay den husticia.
Segun K.L. pa e no cay mas den man di husticia, e lo mester bay for di Aruba. Pasobra na Aruba e ta blo cay den mal caminda y tin problema cu cierto hendenan.
Fiscal: Fiscal a bisa Hues cu e ta haya cu K.L. ta culpabel di bende droga. Fiscal a remarca cu promer K.L. tabata nenga di tabata bende y awor den Corte el a bisa cu e tabata bende algun biaha. Fiscal a mustra cu tin diferente testigo ta bisa cu nan tabata cumpra pa algun luna y diferente biaha pa siman. Hasta e primo di K.L. a bisa cu e tabata cumpra for di K.L. Na opinion di Fiscal, si mira tur e declaracionnan, ta mas cu 6 luna cu a acusa K.L. pa bendemento pero Fiscal ta mantene na 6 luna. El a bisa tambe cu el a haya K.L. cu algo mas cu 22 gram di marihuana den su auto.
Fiscal tambe ta haya proba cu K.L. tabatin 2 arma y balanan. Esakinan ta casonan hopi serio. Arma ta sumamente peligroso. Fiscal a bisa cu e ta tene cuenta cu K.L. di 19 aña ta un hoben y ta un recidivista pa droga y arma di candela.
Fiscal a exigi 30 luna di prison, di cual 6 luna ta condicional cu 3 aña di prueba. Durante e tempo di prueba, K.L. ta bay bou guia di Reclassering. Tambe Fiscal a exigi pa impone 3 luna di prison cu tabata condicional di un otro castigo cu K.L. a haya. Fiscal a exigi pa destrui e droga, atributonan di marihuana. E 2 armanan y balanan mester wordo destrui. E auto, smartphone y 10 mil florin cu a confisca, lo mester wordo debolbe.
Abogado: Abogado mr. Tromp a bisa Hues cu K.L. a admiti tur cos. E abogado a pidi Hues pa no impone e 3 luna condicional acerca di e castigo, sino impone un periodo di prueba mas largo.
Sentencia: Hues a cera tratamento di e caso y a dicta sentencia di biaha. Hues ta haya cu K.L. ta culpabel di bendemento di marihuana y tabatin 2 arma di candela cu balanan den su poder. Hues ta haya cu en todo caso pa 6 luna, K.L. tabata bende droga. Hues a bisa cu e ta comparti punto di bista di Fiscal, cu armanan di candela ta hopi peligroso y riba caminda publico, ta causa inseguridad den comunidad. Hues a bisa cu e bendemento di droga ta pone e salud den comunidad na peliger.
Hues a remarca cu K.L. ta move net den e parti negativo di comunidad. Esaki ta door cu K.L. su comportacion no ta bon. Hues a bisa cu ta K.L. mester cambia y no esnan rond di dje. Na opinion di Hues, tin oportunidadnan pa K.L. cambia su bida pero e ta exigi disciplina y disponibilidad.
Hues su decision ta cu e suma di placa 10 Mil Florin y e smartphone ta keda confisca pasobra Hues ta haya cu eseynan tin di haci cu droga. E auto lo wordo debolbe. Hues a condena K.L. igual na e exigencia di Fiscal.
