Awe Hues ta dicidi
ORANJESTAD (AAN): Awe Hues ta bay dicidi riba peticionnan di abogado mr. Rosenstand relaciona cu e caso penal cu Ministerio Publico a cuminsa contra e homber K.((59). Fiscal a presenta acusacionnan serio contra K. cu ta encera entre otro abuso di dos mucha muher menor di edad, posesion di seis arma di candela.
ABUSO DI DOS MENOR DI EDAD
Dia 12 Juni 2025, tabatin e caso penal “pro forma” di K. E dia ey, K. no a kier a bay Corte y a keda na KIA. No tabatin tratamento di e caso, sino cu Hues tabata kier sa si abogado tin peticion pa investigacion(nan) y fiha un fecha pa tratamento di e caso. E acusacionnan cu Fiscal a presenta contra K. ta:
- Den e periodo entre 4 April 2015 te 13 Mei 2023, K. a abusa di un mucha muher menor di edad.
- Fiscal ta acusa K. tambe di cu entre 25 Augustus 2019 te 13 Mei 2023, K. a abusa di un otro mucha muher menor di edad.
- Fiscal a sigui bisa cu K. ta wordo acusa di tabatin pornografia infantal den periodo di 27 Juni 2022 te 4 Maart 2025.
SEIS ARMA DI CANDELA CU BALA Y PEÑA
- Fiscal tambe a acusa K. di posesion di seis arma di candela, balanan y peñanan riba 4 Maart 2025.
Ta asina cu abogado mr. Rosenstand a haci diferente peticionnan y Hues a palabra cu awe mainta e ta tuma un decision. Awe ta haya sa kico Hues su decision ta y kico ta bay pasa cu tratamento di e caso.
