Caso interesante den Corte
*Acusado ta ex-chauffeur di Prome Ministro
ORANJESTAD (AAN): Awe Diabierna mainta Corte di Husticia ta trata e caso penal cu Ministerio Publico a cuminsa contra e homber di inicial S.R.K. Por corda cu su detencion a hala atencion, como cu S.R.K. tabata e chauffeur di ex-Promer Minister Evelyn Wever-Croes.
Abuso di mucha: Den Corte, un di e acusacionnan cu Ministerio Publico lo presenta contra e ex-chauffeur K. di 59 aña di edad, ta cu el a abusa sexualmente di un mucha bao di 16 aña di edad. Den Corte lo bay haya sa si acaso ta abuso sexual cometi contra 1 menor di edad, of si acaso ta 2 menor di edad tin den e situacion aki.
Cantidad di arma: Den e mesun caso den Corte aki, e otro acusacion di Fiscal lo presenta ta cu entre 2015 y Mei 2023, e homber K. tabatin 6 arma di candela.
Scucha testigonan: Manera ta conoci, ya caba na luna di Juni 2025, Hues a tuma decision riba e peticionnan di abogado mr. Rosenstand, pa cu investigacionnan cu e ta desea pa sosode promer cu tratamento di e caso.
Hues a bisa cu e ta rechaza e peticion pa laga K. liber. Pues keto bay e ta encarcela, y lo wordo treci cu Van di C.E.A. for di Prison di KIA te na Palacio di Corte di Husticia.
Riba e peticion pa scucha 6 testigo, Hues a dicidi cu lo scucha 4 testigo, 3 dama y 1 homber. Hues a bisa cu lo manda e caso pa Hues Comisario, kende lo scucha e testigonan.
Riba e peticion pa duna bek e 6 armanan na e organizacion di practica di tiro, Hues a rechaza esaki. Hues a bisa cu lo mester warda resultado di e caso penal.
A keda palabra cu awe Diabierna mainta, tratamento di e caso ta tuma lugar. DIARIO lo informa lectornan di tur loke a pasa den sala di Corte di Husticia di Aruba.
