ORANJESTAD (AAN): Ministerio Publico a dicidi pa bay den apelacion den e caso penal yama “Rixa” contra e sospechoso C.E.
, acusa di traficacion di hende, di smokkel di hende y di a pone tres persona traha pe ilegalmente durante varios periodo na 2024 y 2025.
Corte den Prome Instancia a condena e sospechoso pa un castigo di prison di 10 luna, di cual 4 luna ta condicional, cu un tempo di prueba di 2 aña, mas un multa di AWG 5.000.
Pero tambe Corte a declara e sospechoso liber di e acusacion di traficacion di hende, anto ta riba e parti specifico aki di e decision, cu e apelacion ta dirigi.
Ministerio Publico ta considera e motivacion tras di e decision di hues pa declara e sospechoso liber, insuficiente.
E consideracionnan di Corte ta asina limita cu pa Ministerio Publico no ta duidelijk riba kico e decision pa declara C.E. liber, ta basa.
Mirando e gravedad di traficacion di persona como un crimen contra libertad personal y su impacto den comunidad, Ministerio Publico ta considera necesario pa Corte Superior di Husticia re-evalua e caso.
E sentencia aki por ademas hiba na posible confusion den comunidad, particularmente bao di doñonan di bar unda muhernan ta traha den e industria sexual.
Actualmente no ta parce mucho cla kico ta e marco legal cu mester wordo aplica, ni kico ta permiti of kico ta prohibi den e trato cu trahadornan den e sector en cuestion.
Ministerio Publico ta haya hopi importante pa bin claridad, tanto desde e punto di bista huridico como social.
