ORANJESTAD (AAN): Mañan mainta e dos agentenan di Polis, M.V. y R.D. ta presenta dilanti Hues pa e caso penal cu Ministerio Publico a cuminsa contra nan.
TIRA MATA HOBEN
Ambos agente di Polis ta wordo acusa cu riba 9 Februari 2025 a mata e hoben J.F. Lanoy q.e.p.d. E acusacion ta sigui cu intencionalmente M.V. y R.D. a los varios tiro cu nan arma di Polis riba Lanoy y su vehiculo, cu e lamentable consecuencia cu Lanoy a fayece.
E lamentable incidente aki a conmove henter comunidad. Hasta tabatin videonan di casnan den vecindario cu a capta momento cu e persecusion di Polis tras di Lanoy tabata tuma lugar. Despues di un rato por a scucha un cantidad di tiro cu e lamentable resultado cu Lanoy a fayece.
AGENTENAN SUSPENDI
Relaciona cu e caso, M.V. y R.D. ta suspendi pa cu e investigacionnan cu a tuma lugar y tambe pendiente resultado di e caso penal cu Ministerio Publico a dicidi di cuminsa contra nan.
CASO REGIE
Informacion cu ta dispone di dje ta mustra cu tratamento di e caso mañan mainta ta “regie”. Esey ta nifica cu e dos agentenan di Polis mester presenta cu nan abogado den Corte, caminda Fiscal lo haci e acusacionnan contra nan. Despues di esey, e abogadonan tin oportunidad di pidi Hues, si nan ta haya necesario, pa laga haci mas investigacion. Fiscal lo tin oportunidad di reacciona y finalmente Hues lo tuma un decision y lo stipula un fecha caminda tratamento di e caso lo tuma lugar.
