Famia di Sergio Maduro ta reclama den Corte Superior
ORANJESTAD (AAN): Famia di e victima di asesinato, Sergio Maduro, a expresa nan mes den Corte Superior, durante tratamento di e apelacion di Jennifer Gonzalez. E famia ta haya cu tur e cos di handicapped, ta un comedia cu Jennifer ta haci pa haya su libertad.
Famia a manda carta pa hof: E famia no tabata presente den sala di Corte, pero e tata di Sergio Maduro, a traha un carta den nomber di famia y a manda esaki pa Hof di Corte Superior.
Manera ta conoci, a haci cambio den ley penal caminda awor ta duna famia di victima e oportunidad di expresa nan mes den Corte. E famia por bisa kico tur a experiencia y kico nan ta spera pa cu e castigo.
Acusado ta pretende di tin discapacidad: Hof a mustra cu famia di Sergio a skirbi un carta pa expresa nan mes den e caso. Presidente di Hof a lesa e carta. E famia ta expresa cu perde un famia no ta facil. E ta afecta henter famia especialmente ora ta un morto hororoso.
E ta un asesinato planea sanger frieu. Despues di e incidente, e famia tabatin dos pregunta, kende a haci e asesinato y pakico. Pa tende cu ta un homber otro di Jennifer, pakico Jennifer no a termina e relacion y bay cu e otro homber! No ta Jennifer a traha e plan pa mata Sergio? Pero e forma con a mata y pasa auto riba Sergio, ta pa motibo di Jennifer.
Awor Jennifer kier pretende di ta un handicapped. No ta asina! Ta Jennifer a planea tur cos. E asunto aki di Corte Superior no ta sinti bon. E argumento di handicapped no ta valido. Tur cu conoce Jennifer sa cu e no ta handicapped. El a traha hopi aña na Wendy’s. Ora Jennifer a drenta sala di Corte pa promer biaha, e famia a grita yora y bisa cu nan no ta reconoce Jennifer.
Esey ta mustra cu nan no a spera cu Jennifer ta hunga comedia. Kico lo a pasa Jennifer ora el a worde deteni.
Mientras cu Jennifer ta bringa pa haya su libertad door di pretende cu e tin discapacidad (handicapped), nos no por haya Sergio Maduro mas. Nan ta spera cu Hof lo duna Jennifer e castigo husto.
E potret ta mustra e anochi cu a haya e resto mortal di Sergio riba e caminda di Matividiri.
