Fiscal a pidi 10 aña pero Hues a duna 2½ aña
ORANJESTAD (AAN): Diabierna mainta e sospechoso G.E.T. di 40 aña a presenta den Corte pa scucha su sentencia. Hues a reduci e exigencia di Fiscal di 10 aña di prison, y a dune castigo di 2 aña y 6 luna di prison.
Exigencia di Fiscal: Dia 3 October 2025, tratamento di e caso a tuma lugar caminda Fiscal ta haya G.E.T. culpabel di importa cocaina entre 24 y 26 December 2024 y cu el a causa morto di Timothy D’Aguiar riba 26 December 2024. E dia ey e defunto a yega Aruba for di Colombia, cu 42 bolitanan di cocaina pero 2 bolita a rementa den su stoma.
Fiscal a mustra cu na 2021, G.E.T. tabata envolvi den un caso di droga caminda un mula a muri door cu bolitanan di droga a kibra den su stoma. Fiscal ta haya cu esaki no a pone G.E.T. stop. Fiscal a exigi 10 aña di prison.
Sentencia: Hues a bisa cu e ta haya proba cu entre 24 December y 26 December 2024, G.E.T. hunto cu otro a importa cocaina.
Hues a sigui bisa cu e no ta haya legalmente proba cu G.E.T. a causa morto di D’Aguiar. Hues a splica cu segun ley, mester di prueba cu G.E.T. tabata conciente cu e bolitanan di cocaina no tabata bon prepara. Hues ta haya cu esey no a keda proba.
Pa loke ta importacion di cocaina, Hues ta considera cu G.E.T. tabata e organizador. Hues a mustra cu ta G.E.T. a duna D’Aguiar placa, G.E.T. a percura pa e homber Z. bay cu D’Aguiar Colombia pa percura cu D’Aguiar ta guli e bolitanan.
Hues a bisa cu ta conoci cu guli bolitanan di cocaina, por habri den curpa den hende y cu e hende por muri. Esey a sosode tambe cu D’Aguiar caminda 2 bolita a kibra den su stoma.
Hues a remarca cu G.E.T. ningun momento durante tratamento di e caso, a mustra su responsabilidad di loke el a haci. E tabata blo tira culpa riba otronan. Hues ta tuma G.E.T. na malo pa esaki.
Pa cu e castigo, Hues a bisa cu e ta tene cuenta cu G.E.T. a yega di worde condena caba pa algo similar. Apenas G.E.T. a sali for di KIA , cu el a bolbe haci mesun cos. Hues ta haya cu G.E.T. no a siña. Hues ta considera G.E.T. como recidivista. Hues a tene cuenta cu e homber Z. a haya 24 luna di prison. Hues a condena G.E.T. na 2 aña y 6 luna di prison.
