Abogado mr. Carlo a cuestiona forma no corecto di interogacion
ORANJESTAD (AAN): Un caso di traficacion di marihuana caminda 4 homber ta envolvi, a wordo posponi ora cu abogado mr. Carlo, defendiendo e homber Jamaiquino F.G.G., a cuestiona e forma incorecto di interogacion di e team di narcotica.
E abogado a mustra cu loke ta poni riba papel, no ta cuadra cu loke realmente a sosode den interogacion. E abogado a bisa cu el a pidi Fiscal pa mira e video di interogacion y a constata cosnan cu ta viola e norma di un bon proceso di Corte.
Traficacion di marihuana: E hombernan Mericano di inicial A.T. di 43 aña, M.L. di 27 aña, J.B. di 30 aña, y e Jamaquino F.G.G. di 43 aña ta wordo acusa di a importa marihuana na Maart 2025.
Fiscal a bisa cu M.L. dia 21 Maart 2025 a wordo gara na aeropuerto cu 3.428 gram di marihuana den maleta. E homber A.T. tambe a wordo gara na aeropuerto cu 3.070 gram di marihuana den maleta. J.B. y F.G.G. ta wordo acusa di ta complice. En total ta mas o menos 6 kilo di marihuana a keda confisca.
Cuestiona forma di interogacion: Abogado mr. Carlo di F.G.G. a pidi Hues pa presenta un critica promer cu tratamento di e caso cuminsa pa señala cosnan cu a viola e norma di proceso husto di Corte. E abogado e bisa Hues cu e hecho cu a viola norma, e ta haya cu mester declara Fiscal no admisible. Na opinion di mr. Carlo, Fiscal debidamente a viola norma.
- Carlo a mustra Hues cu durante interogacionnan cu a graba y filma, informacionnan importante di acusadonan a keda intencionalmente laga afor di e relato oficial di agentenan di narcotica pa mustra cu F.G.G. ta doño di e droganan.
E abogado a señala cu riba papel tin declaracionnan poni pero riba grabacion e ta completamente diferente. E abogado a mustra con agente di narcotica di bisa acusado cu e mester bisa cu ta F.G.G. y pa haci liher. E abogado a señala cu e agentenan di narcotica no a graba video di interogacion di e sospechoso J.B., aunke cu tin e aparato den e cuarto.
E abogado a mustra con durante interogacion, diripiente e grabacion ta para y despues ta sigui. Na opinion di abogado mr. Carlo, Fiscal deliberadamente a viola norma di bon proceso y mester declara Fiscal no admisibel den caso contra F.G.G.
Hues a bisa cu sa socode mas biaha cu Polis ta presiona acusado y ta guia acusado pa duna declaracion. Hues kier sa di abogado mr. Carlo, unda Polis ta bay di mas den esaki. Abogado mr. Carlo a bisa cu e agentenan a presiona tur e acusadonan pa declara cu ta F.G.G. ta doño di e droga. Hues a bisa cu e no tin e grabacionnan di interogacion sino solamente relato.
Keda tarda pa haya grabacionnan: Fiscal a bisa cu mr. Carlo a pidi pa mira e videonan di interogacion na September 2025 y pakico ta te awor numa e ta bin cu esaki. E abogado a mustra cu e team di Narcotica cada biaha tabata pospone cita cu nan mes a palabra. Tambe tin biaha e abogado tabatin casonan. Esey a haci cu a keda tarda.
Fiscal a bisa cu e no tin suficiente informacion pasobra e tampoco a mira e videonan di interogacion. El a pidi Hues pa rechaza demanda di abogado.
Hues a pospone caso: Hues a bisa cu e no por dicidi riba videonan cu e no a mira. Hues a sigui bisa cu e kier haya e videonan di interogacion di tur cuater sospechoso, pa e mes evalua si tin un proceso husto of no.
Hues a bisa e otro abogadonan pa papia cu nan cliente y mira kico lo haci. E otro abogadonan a pidi Hues pa sigui cu e caso te caminda Fiscal ta exigi castigo y dia 10 November 2025, nan lo hiba defensa. Ta asina cu Hues y tambe Fiscal ta haya cu ta mihor pospone e caso pa asina mira si tin violacion di norma.
Hues a pospone e caso pa dia 10 November 2025. Hues a instrui Fiscal pa percura pa tur e abogadonan haya copia di e videonan di interogacion.
