E sospechosonan y nan abogadonan no kier pa a trata e caso via pantaya
ORANJESTAD (AAN): Dos Haitiano W.E.(18) y R.B.A. (20) a pidi pa ta presente den Corte y nan abogadonan tambe ta haya no agradabel pa trata e caso via pantaya (video conference). Hues a evalua e situacion, teniendo na cuenta e situacion di tuberculosis na KIA y a dicidi di pospone e caso pa asina na Augustus 2025 trata e caso.
ASALTO ARMA CU VIOLENCIA
Den sala di Corte tabata presente e mayornan di e sospechosonan. Via un pantaya grandi, Hues, Fiscal y abogadonan por mira e sospechosonan W.E. y R.B.A. den un oficina na KIA, cu un mascara di proteccion na nan nanishi y boca. Fiscal a bisa Hues cu e duo ta wordo acusa di a haci asalto arma cu violencia riba 2 September 2024, caminda dos persona, M. y B. tabata e victima. Fiscal a bisa cu e duo a uza violencia caminda a maltrata B. y a pone arma riba cabez di M. y a bis’e pa keda keto.
ABOGADONAN A PROTESTA
Door di e situacion na KIA cu tin lock down door di tuberculosis, mester a trata e caso via video conference. Abogado mr. Soekander di B.A. hunto cu mr. Rep, a protesta e forma di comunicacion via video conference. E abogadonan ta haya cu e no ta practico pasobra no tin comunicacion personal cu nan cliente. E abogadonan a bisa cu nan no por papia cu nan cliente durante tratamento di e caso manera lo por sosode ora di tratamento di e caso den sala di Corte di Husticia. E abogadonan a mustra cu door di e pandemia di Tuberculosis, nan cliente B.A. a keda contamina. E abogadonan ta haya cu esaki ta un proceso inhusto di tratamento di caso. Nan a mustra cu a base di ley, B.A. tin e derecho pa ta presente den sala di Corte pa tratamento di e caso. E abogadonan a pidi pa pospone e caso y laga B.A. liber te dia di tratamento di e caso.
Hues a remarca cu e peticion tin consecuencia cu e termino den cual e caso lo wordo trata. Hues a bisa cu e tin comprension pa cu e critica pero tin un situacion cu mester biba cu ne. Si no por trata e caso awor, lo mester pospone e caso.
Abogado mr. Ras a bisa Hues cu e ta preocupa pa e hecho cu su cliente W.E. ta sinta banda di B.A. cu tin tuberculosis. En principio e kier trata e caso pero W.E. kier ta presente. Sino, e abogado ta comparti punto di bista di su coleganan pa pospone e caso y laga e sospechosonan liber.
LOCKDOWN DEN KIA TA CLA
Hues a bisa cu e por a compronde cu e lockdown den KIA ta cla, den e sentido cu no tin peliger di contaminacion. Tin conseho di parti di instancia concerni, pa laga e caso sigui pa algun siman via video conference.
Fiscal a bisa Hues cu ta trata di sospechosonan hopi hoben y e tambe lo tabata kier pa nan ta den Corte presente. El a mustra cu lo ta mihor sigui cu tratamento di e caso y a pidi Hues pa rechaza e peticion di pospone e caso. E peticion pa laga e sospechosonan liber, Fiscal a mustra cu tin motibo di peso y no por laga nan liber mirando e seriedad di e caso.
POSPONE CASO
Hues a bisa cu e ta bay tuma decision cu e caso lo wordo posponi. E ta haya cu pa un proceso husto, tur hende lo mester ta presente. Den e caso aki ta dos hoben y nan mayornan ta presente y nan mayornan kier mira nan. E ta haya cu lo ta mihor pa nan ta presente y no via video conference. Hues a propone 22 Augustus 2025 pa 10’or di mainta.
SOSPECHOSO MESTER KEDA SERA
Hues a sigui bisa cu pa loke ta e peticion pa laga e sospechosonan liber, esaki ta wordo rechaza. Nan ta keda encarcela pendiente di e caso. Hues a bisa cu aunke cu nan ta hoben, e caso cu nan ta wordo sospecha di dje ta hopi serio y e castigo cu tin pa e delito aki, no lo ta menos cu e tempo cu nan ta sera te cu 22 augustus 2025. Hues a bisa cu e dia ey lo trata e caso completo y lo mira kico lo resulta.
