Hues di Corte di Husticia den Promer Instancia
ORANJESTAD (AAN): Hues di Corte di Husticia den Promer Instancia a haya e homber Chines K.N.W. (37) naci na Venezuela, culpabel di no a declara na Douane cu e tabatin mas cu 28 mil dollar cash. Hues a confirma exigencia di Fiscal, cu e placa aki ta keda confisca.
NO A DECLARA SUMA GRANDI NA DOUANE
Fiscal a bisa cu K.N.W. ta wordo acusa cu riba 12 Februari 2024, K.N.W. a keda sin bisa cu e tin un suma grandi di placa na frontera di Aruba pa viaha pa Colombia. Ta papia di mas cu 20 mil dollar. Ta asina cu K.N.W. a admiti y a bisa cu e placa tabata dividi den 4 hende. K.N.W. a bisa cu e placa tabata di un compania di famia. Segun K.N.W. e sa cu no por pasa mas cu 10 mil dollar y pesey a parti e placa cu otro tres persona. Hues a puntra diferente biaha pakico K.N.W. no a bisa cu e tabatin asina hopi placa cune. K.N.W. a bisa cu el a sigui conseho di su mayornan pa asina hiba placa cash Colombia pa haci negoshi. Hues a mustra cu e otro tres personanan a bisa cu nan a haya e placa for di K.N.W.
K.N.W. a bisa cu e ta conciente cu el a haci malo pero e placa tabata pa tratamento medico di su mayornan y traha apartamento. Hues a bisa cu Polis a haci investigacion cu ta mustra cu enberdad e mayornan a lanta e placa for di banco.
FISCAL A EXIGI PA E PLACA KEDA CONFISCA
Fiscal a bisa cu e notificacion obligatorio na Douane no ta por nada. Gobierno kier evita cu hendenan ta drenta y sali cu sumanan grandi. E ta lamentable cu K.N.W. tabata sa cu e mester a declara e suma na Douane pero no a haci esaki. E ta haya cu e splicacion di K.N.W. no ta mucho creibel. Fiscal ta haya cu ta intencionalmente K.N.W. a haci esaki.
Fiscal a bisa Hues cu tin un sentencia di aña pasa pa un caso similar caminda a confisca e placanan cu no a declara. Fiscal a exigi pa confisca e mas di 28 mil dollar cu K.N.W. no a declara na Douane.
ABOGADO
Mr. Kuster a bisa Hues cu K.N.W. ta admiti di a haci malo. K.N.W. ta haya importante pa a splica cu e no a haci nada contra ley sino a base di nan tradicion, a haci asina pa yuda su mayornan na Colombia. E abogado a splica cu e mayornan ta bay dos vez pa aña Colombia pa haya tratamento.
SENTENCIA
Hues a sera tratamento di e caso y a dicta sentencia di biaha. Hues ta haya cu tin suficiente prueba cu K.N.W. kier a viaha pa Colombia sin declara e cantidad di placa cu e tabatin. Esaki ta castigabel. Hues ta comparti opinion di Fiscal cu esaki ta un forma di control cu autoridad ta haci pa evita cu tin circulacion grandi di placanan. Hues ta haya e exigencia di Fiscal na su lugar. Hues ta haya cu mester manda señal cla pa comunidad cu no por actua asina. Hues a dicidi cu e mas cu 28 mil dollar ta keda confisca.
