ORANJESTAD (AAN): Hues a rechaza e protesta di Hillegonda Rodriguez-Taekema di oficina di Notario Taekema,
Cyrielle de Nobrega Arends, Julisa Dabian contra e decision di Minister di Husticia y Asuntonan Social di e Gobierno anterior cu a nombra un otro persona como notario.
Ta asina cu riba 28 Maart 2025, e Gobierno anterior a nombra Carine Rafine como Notario entrante 1 Mei 2025.
Ta asina cu Rodriquez-Taekema, Nobrega Arends y Dabian a cuminsa un caso di protesta contra e decision aki. Tratamento di e caso aki a tuma lugar luna pasa 23 y 29 April 2025. Esaki pasobra e tres candidato pa Notario ta haya cu nan a wordo recomenda door di e comision di Hof y e minister a nombra un otro persona como Notario.
Hues den su evaluacion den e sentencia ta contradeci ponencianan di parti di Gobierno y Rafine cu ta riba aprobacion di Hof esaki a tuma lugar. Hues a mustra cu tin un procedura cu mester sigui caminda miembronan di Corte Superior (Hof) tin cu laga e candidatonan pasa un examen y tambe tin otro procedura cu mester sigui pero cu no ta asina cu Hof ta duna un recomendacion na Gobierno pa cu e nombramento di Notario.
Hues a mustra cu Hof a recomenda tres candidato cu ta esnan cu a cuminsa e caso di protesta. Pero ta asina cu e Gobierno a propone Rafine y Hof ta haya cu e ta capacita pa haci e trabao.
Hues su conclusion ta cu e ta rechaza e protesta di e tres candidatonan.
