ORANJESTAD (AAN): Diaranson mainta tres sospechoso den caso Avestruz cu den Corte Superior, Hof,
a declara liber, a haya aprobacion di Hues pa Gobierno paga nan gastonan. Ta trata aki di Carlos Mansur, Ninosca Nuñez y Edgard Werleman.
HOF A DECLARA NAN LIBER
Na Mei 2024, Procurador General (PG), a exigi pa mantene e sentencia pa Nuñez, Werleman, Mansur cu ta 2 aña di prison di cual 1 aña ta condicional cu 3 aña di prueba. Tambe un boet di 25 mil florin.
Dia 12 di Juli 2024, Hof a dicta sentencia caminda cu Hof a rechaza e defensa cu a cuminsa caso contra Werleman, Nuñez y Mansur y no otronan. Hof ta haya cu ta keda na Ministerio Publico pa dicidi kende ta persigui. Hof a bisa cu e no ta haya cu tin malversacion di Gobierno cu e terenonan cu a bende pa hopi placa. No por bisa cu Mansur, Nuñez y Werleman no kier a desaroya nan proyectonan. Hof a bisa cu Mansur por a haya financiamento di su famia. Hof no ta haya proba cu conhuntamente cu Sevinger, Mansur, Nuñez y Werlema a malversa Gobierno. Hof a declara Werleman, Nuñez y Mansur liber di malversacion di Gobierno.
CUMINSA CASO DI DAÑO
Ta asina cu tur tres sospechoso a cuminsa caso di daño contra Gobierno. Den e caso di Mansur ta pa e gastonan di abogado. Den e caso di Werleman y Nuñez ta e gastonan di abogado y daño per juicio pa e dianan cu nan tabata encarcela pendiente investigacion.
GOBIERNO MESTER PAGA GASTO DI ABOGADO
Hues den su sentencia, a rechaza e demanda di daño perhuicio pa e dianan cu Werleman y Nuñez tabata encarcela. Hues a aproba e demanda pa Gobierno paga e gastonan di abogado pa Mansur, Werleman y Nuñez. Esey ta nifica cu e abogadonan lo manda cobra Gobierno pa e gastonan haci pa nan cliente den caso Avestruz.
