ORANJESTAD (AAN): E homber Venezolano J. di 51 aña, bibando indocumenta na Aruba,
Diabierna mainta a scucha Hues confirma e exigencia di Fiscal di 5 aña di prison. Hues ta haya J. culpabel di entre 2022 y 22 Mei 2024 a tene relacion sexual y actonan inmoral cu su mesun yiu muher Y. di 14 aña di edad.
Den sala di Corte tabata presente e yiu muher Y. y su mama. Por a mira con constantemente e yiu muher tabata yora durante tratamento di e caso.
Tata a admiti y ta arepenti: Hues a puntra J. si el a abusa di su yiu muher. J. a admiti y a bisa Hues cu e ta arepenti di loke el a haci. Hues a puntra J. con esaki por a pasa.
Segun J., diripiente, gana a drenta den dje. El a bisa Hues cu nunca antes el a haci algo asina. El a bisa cu te dia di awe e ta puntra pakico el a haci esaki. Hues a puntra con J. ta bay abusa su propio yiu.
Tata a forza e hoben tene relacion sexual: Hues a mustra cu e hoben Y. di 14 aña a declara na miembronan di KZP, cu el a worde abusa door di su tata. El a bisa cu su tata J. a bis’e cu el a mira un video caminda un tata ta tene relacion sexual cu su yiu muher. E mucha ta conta cu su tata a mishi cu ne.
Segun e mucha Y., su tata a bis’e cu no mester wak’e como tata sino como un pareha.
Homber a mustra yiu pornografia: E mucha ta conta KZP cu su tata a mustr’e un pelicula porno riba cellular. Despues e tata J. a manda esaki pa su yiu Y. y bis’e pa laga sa kico e ta pensa. Y. a bisa cu su school tabata caba tempran y e otro dos rumannan no tabata na cas. J. e cuminsa acerc’e pa tin relacion.
E hoben Y. a bisa su tata J. cu e no tabata kier y tog e tata a tene relacion sexual cu ne den Y. su camber. Esaki tabata sosode ora cu Y. su ruman homber y ruman muher a bay school. E victima a declara na KZP cu J. a cuminsa mishi na su partinan intimo y na dado momento J. a bay drumi riba dje y a penetr’e.
Despues di esey J. tabata bisa Y. pa bay den sala mientras cu e mama ta drumi of bay pafor y den un di e autonan para pafor cu ta pa drecha, J. tabata tene relacion sexual cu su yiu.
Mucha a bisa docente di scol: Y. a bisa e miembronan di KZP cu e no tabata sa mas con pa haci pa su tata J. no sigui tin relacion sexual cu ne. E mucha a bisa cu el a bay for di cas diferente biaha pero no a logra. El a bisa cu e no tabata kier a bisa su mama pa no kibra famia.
- a declara na e miembronan di KZP cu el a bisa su tata cu e no kier pero e tata tabata insisti. Tambe e tata a bisa Y. cu e ta laga Y. tin relacion cu Y. su amigo pero cu Y. mester sigui tin relacion sexual cu ne. E mucha a bisa cu e no por a soporta mas y a bay bisa su docente di school kico su tata tabata haci cu ne.
E mucha a bisa cu nunca e kier tabatin relacion sexual cu su tata. Promer cu esey, e mucha a bisa su docente cu e no kier bay cas mas. Hues a bisa cu KZP tin chatnan entre e tata y su yiu muher, cu a haya riba e cellular di Y. For di e chatnan por lesa con J. ta bisa su yiu Y. pa unda pa bay pa nan tin relacion sexual, sin cu otronan por haya sa.
Hues a puntra J. si ta berdad cu tabatin relacion varios biaha. Segun J. nan tabatin relacion sexual varios biaha pero no manera su yiu ta bisa. Hues tabata haci J. preguntanan directo y por a nota cu J. tabata manera duda kico pa bisa.
Hues a mustra cu J. ta ilegal na Aruba desde 2017. E ta traha como bodyman.
Reclassering den su raport ta mustra cu J. a bin ilegal pero su pareha si tin permiso pero e tres yiunan no. E pareha a keda den shock ora e yiu muher a cont’e kico a pasa. E yiu a sali for di cas y a bay biba cerca su amigo y no kier bay cas mas.
- a admiti di a abusa di su yiu muher. J. ta puntra su mes pakico esaki a sosode. Segun J., Y. tabatin 14 aña ora el a tene relacion sexual cu ne. E tabata wak su yiu como un muher y no como su yiu. Reclassering a bisa cu casi sigur ora J. sali for di KIA, e lo worde saca for di Aruba. Pesey no ta necesario pa recomenda pa J. haya guia.
Yiu ta papia den corte: E yiu Y. a bisa cu su tata ta nenga hopi cos pero e tata a tene relacion sexual cu ne den auto. El a bisa cu no ta berdad cu e kier a mata su curpa 3 biaha, manera el a declara na KZP.
El a bisa cu el a bisa esey door di rabia. Na yoramento Y. a bisa cu e ta stima su tata hopi y no ta worry si e tata Sali. E kier wak su tata bon. Por a mira cu e mama tabata yora.
Fiscal: Den su rekisitorio, Fiscal ta haya cu den e caso aki tin prueba di sosten. El a mustra riba e chatnan di WhatsApp entre e homber y su yiu ta suficiente prueba di sosten. Fiscal a bisa cu durante 1 aña y mey, J. tabata abusa di su yiu muher menor di edad.
Fiscal ta haya legalmente proba cu J. a abusa di su yiu muher menor di edad. E ta haya cu J. a kibra e confianza cu e mucha mester tin den su tata. E hecho aki ta afecta e mucha.
Na opinion di Fiscal, loke ta haci e caso mas serio ta cu ta e propio tata, cu mester proteha su yiu, a marca su yiu pa bida largo. Fiscal ta tuma J. na malo pa loke el a haci. El a mustra cu e tata tin 51 aña mientras cu e victima tabata 14 aña. Fiscal a exigi 5 aña di prison.
Sentencia: Hues a sera tratamento di e caso despues cu abogado mr. Kuster a bisa cu su cliente a admiti y e ta lamenta cu e abogado anterior no a laga traha raport psicologo. Hues ta haya legalmente proba cu J. a abusa di su yiu muher Y. E ta haya cu J. a abusa di su yiu cu mester sintie sigur den su cas. Hues a mustra tambe cu loke J. a haci por afecta e mucha pa henter su bida.
Pa cu e castigo, Hues a bisa cu e ta tene cuenta cu no ta 1 biaha so e abuso a sosode. Hues ta haya e castigo exigi pa Fiscal na su lugar. Hues a condena J. na 5 aña di prison.
