Fiscal a exigi 6 aña di prison y 11 aña cu no por ta docente
ORANJESTAD (AAN): Awe Hues di Corte di Husticia den Promer Instancia ta dicta sentencia den e caso penal cu Ministerio Publico a cuminsa conta e homber E. di 46 aña di edad.
Tratamento di e caso a sosode tres siman pasa caminda Fiscal a baha cu tur peso di ley riba e homber E., mientras cu abogado mr. Illes ta haya cu mester declara E. liber. Fiscal ta acusa E. culpabel di, mas cu un biaha entre 2014 y 2017, a forza un studiante na school, e mucha homber M., pa e haci actonan inmoral cun’e. Tambe Fiscal ta acusa E., di pornografia di mucha desde 2011. Fiscal a bisa cu E. a mishi na atras di e mucha M (9) y penetr’e cu dede diferente biaha. Tambe E. a dun’e sunchi.
Mucha kier a mata curpa: Durante tratamento di e caso a sali na cla cu M. ta bay cumpli 18 aña e aña aki y aña pasa, 2024, despues di a purba mata su curpa, el a bisa su mama cu E. a abusa di dje.
Aña pasa miembronan di KZP a cuminsa cu investigacion cu a conduci na detencion di E.
Acusado ta nenga: Hues a bisa cu un persona cu tabata core pasantia na e school, a declara na KZP cu el a mira E. ta haci movecionnan sospechoso. El a mira E. a brasa un mucha di patras y a frega cu su parti intimo na e mucha. E. a desmenti esaki. El a bisa Hues, cu tin biaha e sa kraak muchanan su lomba pero ningun momento e ta frega riba e mucha.
Fiscal sinembargo a presenta dilanti cu prueba, con docente E. tabatin chat basta pisa riba sex cu un mucha homber. Segun E., tur esey tabata wega cu nan tabata haci. Segun E., eseynan no tabatin ningun balor sexual. Fiscal a remarca cu tabatin palabranan basta pisa cu ta duna e impresion cu nan lo kier tabatin relacion cu otro. Fiscal a mustra tambe cu E. tabatin un potret di un mucha den baño cu su parti intimo afor. E. a bisa Hues, cu el a bay saca e potret y net e momento ey, e mucha a haci asina.
Fiscal a mustra cu e mucha M. hasta a declara cu el a pensa di mata su mes. E. a bisa cu e ta haya hopi lamentable esey. El a sigui bisa cu e por a compronde cu tabatin problema familiar den famia di M. y cu e famia a dicidi di bay Hulanda. E. a bisa cu e no sa pakico M. a declara asina contra dje, siendo cu nada a pasa. El a bisa cu e ta un persona hopi familiar cu muchanan pero esey no ta conduci cu e ta bay abusa di mucha sexual.
Fiscal a exigi 6 aña di prison: Fiscal a bisa cu e ta tene cuenta cu diferente biaha E. a abusa di un mucha homber cu e tempo ey tabatin 9 aña. Fiscal ta haya cu E. a haci actonan inmoral y tabatin relacion cu e mucha. Fiscal ta haya cu E. a abusa di e confianza cu e mayornan y e mucha mester tin den un docente di deporte.
Fiscal a mustra cu por a scucha di e mama, cu 4 biaha, M. a purba mata su mes. E hoben ta bou tratamento y tin problema psicologico. E mayornan ta biba den un angustia cu M. ta bolbe purba mata su mes. Fiscal a bisa cu ultimo añanan, hopi caso di abuso a bin Corte y e reaccion di comunidad a pone cu a cambia castigonan pa abusonan sexual. A subi e castigo.
Fiscal a expresa cu ni cuanto castigo duna, no lo kita kico a pasa cu M. Fiscal a exigi 6 aña di prison pa E. Ademas, el a exigi pa prohibi pa E. sigui eherce su trabao como docente di deporte pa un periodo di 11 aña. Fiscal a pidi Hues pa aproba e demanda di gastonan material di viahe y estadia y e gasto inmaterial cu ta suma 25 mil Florin.
No tin prueba di sosten: Abogado mr. Illes a mustra cu tin testigonan cu ta papia hopi bon di E., pero Fiscal ta wak solamente loke algun ta bisa cu lo ta haya accion di E. straño pa uza como prueba di sosten.
El a remarca cu no tin ningun declaracion di docentenan na school cu ta bisa cu a ripara comportacion straño di e mucha M. na school. Tur esaki ta mustra cu no tin prueba di sosten. E abogado a bisa cu e chat entre E. y un otro mucha tabata wega y nada otro. E ta haya cu no por uza esaki como prueba di sosten.
Mester declara sospechoso liber: E abogado ta haya cu tin duda den e caso aki y mester declara E. liber. Mirando e exigencia pisa di Fiscal, abogado ta haya cu Hues mester ta hopi cauteloso den evaluacion di e caso y ta conclui cu mester declara E. liber. E abogado tambe a cuestiona cu no tur potret di mucha sin paña kiermen cu e ta pornografia di mucha.
Na opinion di e abogado, ta depende ki intension tin su tras. E ta haya cu mester determina si tin aspectonan sexual pa bisa cu ta pornografia di mucha. E abogado ta haya cu pa esaki tambe mester declara E. liber. E abogado a bisa cu si declara E. liber mester desaproba e demanda di daño cu e mama di e victima a presenta den Corte.
Awe Hues ta bisa kico e ta pensa di e caso y kico su decision ta. DIARIO lo informa lectornan tur loke a sosode den sala di Corte di Husticia.
