Hues ta haya cu e declaracion di e mucha no ta confiabel y no tin pruebanan di sosten
ORANJESTAD (AAN): E homber di inicial E. di 46 aña, riba Diabierna mainta a worde declara liber di tur e tres acusacionnan contra dje. E acusacionnan cu Fiscal a presenta ta: (*) Cu mas cu un biaha entre 2014 y 2017, el a forza un alumno M. na actonan inmoral. (*) Pornografia di mucha. (*) A mishi na atras di e mucha M. y penetr’e cu dede diferente biaha. Tambe dun’e sunchi.
Sentencia: Den sala di Corte tabata presente famianan di e sospechoso E. y famianan di e victima. Hues a bisa cu E. pa mas di 10 aña ta docente. E mucha M. tabata alumno y na 2017 a viaha pa Hulanda tempo e tabatin tin 10 aña.
Na 2024, e mama a haci denuncia di abuso contra E. Esaki despues cu M. a purba mata su curpa.
No confia declaracion di victima: Hues a splica cu den casonan di abuso, ta dos hende so tin. Si e sospechoso ta nenga, mester haci uso di pruebanan di sosten. Segun ley, no por tin declaracion di 1 testigo so sino mester tin pruebanan di sosten.
Hues a mustra cu M. na Maart 2024, tempo cu e tin 16 aña, a conta su mama pa promer biaha kico a sosode cu ne. Na Polis el a conta tur loke a pasa cu ne y segun M. esey a sosode mas o menos 5 biaha.
Hues ta Haya cu apesar cu M. tabata hopi amplio den su declaracion, esey no ta cuadra cu e realidad. Hues a bisa cu segun declaracion di M., e abuso lo mester a tuma lugar tempo cu e tabata den 3de klas. Hues a mustra cu segun maneho di e scol, 3de klas lo ta haya gym sino les di landamento.
Tambe Hues a bisa cu M. ta bisa cu tur cos a sosode den e camber di cambia paña den e localidad di gym. Hues a mustra cu e docente di M. a bisa cu M. mester a cambia paña den baño di homber y no den gym zaal. Esey ta haci cu e abuso, manera M. a bisa, no por a sosode. Hues a mustra tambe cu despues di 7 aña di e sucedido, M. ta bay conta su mama.
Declara liber di abuso y actonan inmoral: Tur esaki a pone cu Hues a conclui cu e declaracion di M. no ta confiabel y pesey no tin prueba legal. Hues a declara e docente E. liber di e acusacionnan di abuso sexual y actonan inmoral.
Declara liber di pornografia di mucha: Hues a bisa cu den tablet iPad di E., Polis a haya cantidad di potretnan di muchanan bou di 18 aña sin flanel. Tambe tin potretnan di muchanan cu ta baha nan carson. Hues a bisa cu e, acompaña pa Griffier, a bay check e potretnan. Hues a mustra cu tin varios di e potretnan cu ta e muchanan mes a saca. Tin tres potret cu mucha lomba sunu y un otro cu e mucha tin su parti intimo teni. Tambe tin un screenshot saca di un mucha cu su atras afor.
Na opinion di Hues, no tin prueba cu aki ta trata di pornografia di mucha.
Rechaza demanda di daño: Pa loke ta e demanda di daño. Hues ta haya cu awor cu E. ta worde declara liber, ta rechaza e demandanan.
Hues a declara E. liber y cu ayera mes e ta haya su libertad.
Emocionnan den sala di Corte: Despues di e sentencia, por a ripara cu e famia di e docente E., tabata hopi contento, mientras cu e famia di e victima tabata hopi disgusta.
Ta asina cu segun ley, Ministerio Publico tin 2 siman di tempo pa apela e sentencia. Tempo lo mustra si e caso aki ta worde apela. Si e caso worde apela, Corte Superior, 3 Hues di Curacao (Hof) lo bin trata e caso completamente di nobo y lo dicidi si ta mantene e sentencia di Corte den Promer Instancia of no.
